दाङको घोराही उपमहानगरपालिकामा नेकपा माओवादी केन्द्रबाट हेमराज शर्मा उम्मेदवार बन्ने पक्का भएको छ ।

घोराहीको मेयर माओवादी केन्द्रलाई र उपमेयर नेपाली कांग्रेसलाई दिने सहमति गठबन्धनमा भएको छ ।

माओवादी केन्द्र घोराहीको बैठकले शर्माको नाम सर्वसम्मत सिफारिस गरेको पार्टीका जिल्ला विश्वराज आचार्यले जानकारी दिए । 

शर्मा पार्टीभित्र ‘डायमण्ड’ उपनामले परिचित छन् । दाङका २ उपमहानगरपालिकामध्ये घोराही माओवादी र तुलसीपुर कांग्रेसले लिने सहमति भएको छ । घोराहीमा माओवादी केन्द्रबाट मेयरका आकांक्षी जिल्ला इन्चार्ज जीवन गौतमले पार्टीबाट राजीनामा दिएका थिए । घोराही–१५ निवासी शर्मा माओवादीका केन्द्रीय सदस्य समेत हुन् । 

नेकपा एमालेले अहिलेका मेयर नरुलाल चौधरीलाई नै अगाडि सार्ने पक्कापक्की जस्तै छ तर आधिकारिक निर्णय केन्द्रबाट भएको छैन ।

एमाले महासचिव शंकर पोखरेलको गृहनगर घोराहीमा एमाले र गठबन्धनबीच कडा प्रतिस्पर्धा हुने देखिएको छ ।