राप्रपा नेपालका अध्यक्ष कमल थापाले बीपीको राष्ट्रिय मेलमिलाप नीतिले बहुदल ल्याएको र मदन भण्डारीको जबजले नेपाली कम्युनिस्ट आन्दोलन पतन हुनबाट जोगिएको बताएका छन् ।

सामाजिक सञ्जाल ट्विटरमा लेख्दै अध्यक्ष थापाले सनातन धर्म संस्कृति र परम्पराको रक्षा गर्दै राष्ट्रियता, लोकतन्त्र र हिन्दूत्वको जगमा समृद्ध नेपाल निर्माण गर्ने ‘सम्वर्द्धनवाद’को विचारले नेपाली राष्ट्रवादी आन्दोलनलाई बचाउने र संजिवनीको काम गर्ने बताए ।

अध्यक्ष थापाले लेखेका छन्, ‘समय, काल, परिस्थिति र जनभावना अनुरूप विचार र बाटो परिमार्जन गर्न नसक्नेहरू जडसूत्रमा पतन हुन्छन् । बीपीको राष्ट्रिय मेलमिलाप नीतिले बहुदल ल्यायो, कांग्रेस जोगियो । मदन भण्डारीको जबजले नेपाली कम्युनिस्ट आन्दोलन पतन हुनबाट जोगियो । देशको धरातलीय यथार्थ र जनभावना दृष्टिगत गर्दै हामीले ‘सम्वर्द्धनवाद’को बाटो रोजेका हौं । सनातन धर्म संस्कृति र परम्पराको रक्षा गर्दै राष्ट्रियता, लोकतन्त्र र हिन्दूत्वको जगमा समृद्ध नेपाल निर्माण गर्ने ‘सम्वर्द्धनवाद’को विचारले नेपाली राष्ट्रवादी आन्दोलनलाई बचाउँछ, संजिवनीको काम गर्छ । इतिहासमा राजसंस्थाले गरेका राम्रा कामको सम्मान गर्दै जन सर्वोच्चताको बाटोमा हिँड्नु वर्तमान समयको माग हो । कुनै कालखण्डमा असल ठहरिएका विचार सर्वकालिक र शास्वत हुँदैनन् । कालान्तरमा ती विचार असान्दर्भिक हुन सक्छन् । हिजो बीपी, मदनलाई गाली गर्नेहरू आज उनीहरूको दूरदर्शिताको प्रशंसा गर्छन् ।’