त्रिवि क्रिकेट मैदानमा जारी टी-२० सिरिजको पहिलो खेलमा नेपाल जिम्बावे 'ए' सँग  पराजित भएको छ।

आइतवार भएको पहिलो खेलमा नेपाल जिम्बावे 'ए' सँग ६ विकेटले पराजित भएको हो । 

नेपालले दिएको १ सय ८२ रनको लक्ष्य जिम्बावे 'ए' ले १८ ओभर ५ बलमा ४ विकेट गुमाएर १ सय ८५ रन बनायो ।

त्यसअघि पहिले ब्याटिङ गरेको नेपालले २० ओभरमा ५ विकेट गुमाएर १ सय ८१ रन बनाएको थियो ।

नेपालका लागि आदील आलमले अविजित रहदै सर्वाधिक ४७ रन बनाए । यस्तै कुशल भुर्तेलले ४६ रन जोडे ।

रोहित पौडेलले ३९ रन जोड्दा दिपेन्द्र सिंह ऐरीले २८ रन बनाए । आसिफ शेख ९ रनमा आउट हुँदा आरिफ शेख २ रनमा आउट भए ।

करण केसी ४ रनमा अविजित रहे ।

जीतसँगै जिम्बावे 'ए' ले ३ खेलको सिरिजमा १-० को अग्रता बनाएको छ ।

आईसीसी पुरुष क्रिकेट विश्वकप लिग टु अन्तर्गत अमेरिकामा हुने त्रिकोणात्मक एकदिवसीय सिरिजको तयारीमा स्वरूप नेपालले जिम्बावे 'ए' सँग सिरिज खेलिरहेको हो ।

सिरिज अन्तर्गत नेपालले पाहुना टोलीसँग दोस्रो खेल सोमबार र तेस्रो खेल बुधवार खेल्नेछ  ।

टी-ट्वान्टीपछि नेपालले एकदिवसीय सिरिज खेल्नेछ ।