निर्वाचन आयोगले एउटै चुनाव चिन्ह दिएपछि विराटनगर महानगरपालिकामा स्वतन्त्र उम्मेदवारबीच नै ‘अघोषित गठबन्धन’  भएको छ । 

पार्टी भित्र नै बिद्रोह गरेर गरेर चुनावी मैदानमा आएका बागी उम्मेदवारहरूले एउटै चुनाव चिन्ह पाएपछि चुनावी गठबन्धनको अभ्यास गर्न थालेका छन् । यद्यपी उनीहरूले आधिकारिक रूपमा भने गठबन्धन गरिएको बताएका छैनन् ।

महागनरमा २४ जना  स्वतन्त्र उम्मेदवारहरूलाई निर्वाचन आयोगले लालटिन चुनाव चिन्ह दिएको छ ।

स्वतन्त्र रुपमा चुनाबी मैदानमा उत्रिएका मेयर, उपमेयर, वडाध्यक्ष र सदस्यहरूले एउटै चिन्ह पाएपछि उनीहरू अघोषित रुपमा सहकार्य गरेर प्रचार अभियानमा लागेका छन् ।

विराटनगर १४ मा स्वतन्त्र उम्मेदवार बनेका लालटिन चिन्ह लिएका बबुवा तामाङले लालटिन चिन्ह लिएका मेयरका उम्मेदवार उमेश यादव र उपमेयरका उम्मेदवार न्यौपानेसहितको प्रचार सामाग्री बनाएर घरदैलो गरिरहेका छन् । 

तर लालटिन चुनाव चिन्ह लिएर महानगरको उपमेयरको उम्मेदवार बनेकी नमिता न्यौपानेले भने एउटै चुनाव चिन्हमा धेरै उम्मेदवार हुनु संयोग मात्र भएको बताउँछिन् ।

जनता समाजवादी पार्टी र नेकपा माओवादी केन्द्रबाट विद्रोह गरी उम्मेदवार बनेका उमेश यादव र न्यौपानेले लालटिन चिन्ह लिएपछि धेरै स्वतन्त्र उम्मेदवारले पनि सो चिन्ह रोजेका थिए । 

अन्य दलका उम्मेदवारले चुनाबी प्रचारमा झण्डा बोकेर हिँड्ने गरेकोमा लालटिन चिन्ह लिएका उम्मेदवार र समर्थकहरूले भने लालटिन नै बोकेर हिँड्ने गरेका छन् ।

यसअघिको निर्वाचनमा प्रमुख र उपप्रमुख दुवै पदमा गठबन्धन गरेका यादव र न्यौपानेले एउटै चुनाव चिन्ह लालटिन पाएपछि धेरैले विराटनगरको तेस्रो दल भएको दाबी गर्न थालेका छन् ।