पूर्व अर्थमन्त्री तथा नेकपा एमालेका उपाध्यक्ष विष्णु पौडेलले आर्थिक, भौतिक र मानवीय दृष्टिले बुटवल मुलुककै केन्द्र बन्ने बताएका छन् ।

नेकपा एमाले उद्योगी व्यवसायी निर्वाचन परिचालन कमिटीद्वारा बुटवलमा आयोजित उद्योगी व्यवसायीको भेलालाई सम्बोधन गर्दै उनले सञ्चालनमा रहेका योजना मात्रै पूरा हुँदा बुटवलले नयाँ उचाइ हासिल गर्ने उल्लेख गरे ।   

‘भौतिक र मानवीय विकासमा रुपन्देही निकै अगाडि छ । अरु ठाउँले यहाँबाट सिक्नुपर्छ । अब यहाँ धेरै गर्नुपर्ने केही छैन, शुरू भएका आयोजना सम्पन्न भए मात्र पुग्छ,’ उनले भने ।

‘वर्तमान सरकार र केही विरोधीहरूले बुटवलमा भइरहेका विकासका आयोजनाहरू रोक्ने, पूरा हुन नदिने र विष्णु पौडेललाई असहयोग गर्ने षड्यन्त्र गरिरहेका छन्, हामी त्यस्ता षड्यन्त्रकारीहरूलाई परास्त गर्छाैं,’ उनले भने । 

आफूहरू सरकारमा नरहँदा तत्कालीन सरकारले शुरू गरेका दर्जनौं पूर्वाधारको निर्माण रोकिने र अलपत्र पर्ने खतरा बढेको उनले बताए । त्यसका लागि बुटवलवासीले दबाब सिर्जना गर्नुपर्ने पौडेलको भनाइ छ । 

‘तिनाउमा सिग्नेचर ब्रिज र बुटवलमा ६ लेन सडक निर्माण सकेर यस्तो विद्युत्को प्रबन्ध गर्ने मन छ कि विरोधीहरूका आँखा तिरिमिरी हुनेछन्,’ पौडेलले भने ।

सरकारमा अर्थमन्त्री भएका बेला निजी क्षेत्र उत्साहित हुने खालको बजेट ल्याएको स्मरण गर्दै उनले कोभिड महामारीका बेला पनि अर्थतन्त्र कमजोर हुन नदिएको बताए ।