नेपाली कांग्रेसका प्रवक्ता डा. प्रकाशशरण महतले नेपालबाट लोडसेडिङ अन्त्यको पहल ऊर्जामन्त्री रहेको समयमा आफूले गरेको दाबी गरेका छन् । आफ्नो सरकारले लोडसेडिङ हटाएको भन्ने एमालेको दाबीप्रति उनले आपत्ति जनाए । 

सोमवार पार्टी कार्यालय सानेपामा आयोजना गरिएको पत्रकार सम्मेलनमा पूर्वऊर्जामन्त्री महतले लोडसेडिङ अन्त्य गरेको दाबी गरेका हुन् । 

‘लोडसेडिङ कसले अन्त्य गर्‍यो ? मै हो ऊर्जा मन्त्री, माथिल्लो तामाकोशी स्वदेशी पुँजी जम्मा गरेर कार्यान्वयनमा लगेको माधव नेपाल प्रधानमन्त्री र म ऊर्जामन्त्री रहेको समयमा गरेको हो,’ महतले भने, ‘सैलजा आचार्यको पालामा निजी क्षेत्रलाई विद्युत उत्पादन गर्ने नीति ल्याएका कारण निजी क्षेत्रबाट विद्युत उत्पादन शुरू भएको हो ।’ 

महतले नेकपा एमालेले अरुण तेस्रो आयोजना तुहाएका कारण लोडसेडिङ भएको दाबी गरे । ‘अरुण आयोजना जस्तै एमसीसी फिर्ता गारउने प्रपञ्च भएको थियो । कांग्रेसको नेतृत्वमा फेरि ल्याएको होइन ?,’ महतले भने ।