काठमाडौंका मतदाताको प्रतिक्रिया नेता र राजनीतिक दलप्रतिको आक्रोश- माओवादी नेता गजुरेल

नेकपा माओवादी केन्द्रका नेता एवं पूर्वमन्त्री हरिबोल गजुरेलले काठमाडौं महानगरमा स्वतन्त्र उम्मेदवारले पाएको मत ठूला दल र नेताप्रतिको आक्रोश भएको बताएका छन् । 

जनताको निराशा र आक्रोशबारे गम्भीर ढंगले नसोचे राजनीति दुर्घटनामा पर्ने खतरा रहेको उनले चेतावनी दिए । 

बुधवार प्रतिनिधि सभा बैठकमा बजेटपूर्वको छलफलमा भाग लिँदै पूर्वमन्त्रीसमेत रहेका गजुरेलले जनताको निराशा काठमाडौंका मतदातामा देखिएको बताएका हुन् । ‘माओवादी शान्ति प्रक्रियामा आएपछि कहिल्यै पनि विकासको बारेमा कहिलै छलफल भएन, विकासको मोडलबारे छलफल भएन । यतातिर गम्भीर ढंगले नसोच्ने हो भने राजनीति दुर्घटना पर्न सक्छ,’ उनले भने । 

गजुरेलले जनताको निराशा सम्बोधन गर्न नसके प्रतिगामी शक्तिले टाउको उठाउने खतरा रहेको उनले बताए । ‘काठमाडौंका मतदाताको प्रतिक्रिया नेता र राजनीतिक दलप्रतिको आक्रोश हो, यसतर्फ गम्भीर ढंगले सोच्नुपर्छ,’ उनले भने ।