पोखरा महानगरपालिकाको उपमेयरमा नेकपा एमालेकी मञ्जुदेवी गुरुङ विजयी भएकी छन् । 

पोखरा महानगरको उपमेयरमा उनी दोस्रोपटक विजयी भएकी हुन् । उनले गठबन्धनकी उम्मेदवार नेपाली कांग्रेसकी कोपिला रानाभाटलाई करीब ४ हजार मतान्तरले जितेकी हुन् ।

यसअघि २०७४ सालमा पनि उनले नेपाली कांग्रेसकी नेत्री सरस्वती गुरुङलाई अत्याधिक मतले जितेकी थिइन् । 

मञ्जुदेवीले ६० हजार ५४६ मत पाएकी छन् । मञ्जुले पाएको मत गठबन्धनबाट विजयी मेयर धनराज आचार्यको भन्दा करीब २ हजार बढी हो ।

विक्रम संवत् २०१८ मंसिरमा जन्मिएकी गुरुङको राजनीतिक यात्रा २०३६ सालबाट शुरू भएको हो । २०५८ सालमा उनी नेकपा एमालेको संगठित सदस्य भइन् । धेरै वर्षसम्म अखिल नेपाल महिला संघमा आवद्ध रहेर उनी २०५५ सालमा पार्टीको वडा कमिटी सदस्य भएकी थिइन् । उनी अहिले नेकपा एमालेको केन्द्रीय सदस्य छिन् ।

उनी अखिल नेपाल महिला संघ र पार्टीका विभिन्न तहका साथै विभिन्न सामाजिक संस्थामा पनि आवद्ध भइन् ।

पोखरा महानगरमा उपमेयरका रूपमा यसअघिको कार्यकालमा उनले उपमेयरसँग महिला कार्यक्रम, महिलाका लागि प्राविधिक शिक्षा र रोजगारी, देशभरका न्यायिक समिति सशक्तीकरण लगायतका नयाँ खालका काम शुरू गरेर क्षमता देखाइसकेकी छन् ।

पोखरा महानगरपालिकाको कार्यपालिकामा कांग्रेस र नगर सभामा नेकपा एमालेको बहुमत 

स्थानीय तह निर्वाचन २०७९ मा पोखरा महानगरपालिकामा नेपाली कांग्रेसले २३ वडाध्यक्ष र नेकपा एमालेले ९ वडाध्यक्ष जितेको छ । यसमध्ये कांग्रेसले ९ वडामा प्यानलसहित र एमालेले ७ वडामा प्यानलसहित जितेको छ ।

अधिकांश वडाका अध्यक्ष जितेको कांग्रेसले पोखरा महानगरको कार्यपालिकामा बहुमत सुनिश्चित गरेको छ । कांग्रेसले अध्यक्ष जितेका अधिकांश वडामा एमालेले वडा सदस्य पद जितेकाले पोखरा महानगरपालिकाको नगर सभामा एमालेको बहुमत सुनिश्चित भएको छ । 

पोखरा महानगरपालिकाको नगरसभा १६७ सदस्यीय छ भने कार्यपालिका ४३ सदस्यीय छ । नेकपा एमालेले महानगर उपप्रमुखसहित ९ वडाध्यक्ष र ८६ सदस्यमा जीत हासिल गरेको छ । नेपाली कांग्रेस २३ वडाध्यक्षसहित ७९ सदस्यमा निर्वाचित भएको छ ।