नेपाली कांग्रेसका केन्द्रीय सदस्य नैनसिंह महरले आगामी बजेटमार्फत शिक्षा र स्वास्थ्यलाई नि:शुल्क गर्न सरकारसँग आग्रह गरेका छन् ।

संविधान कार्यान्वयनको चरणमा रहेको र संविधानमै शिक्षा र स्वास्थ्यलाई नि:शुल्क गर्ने कुरा उल्लेख गरिएको स्मरण गराउँदै महरले संविधानको कार्यान्वयनका लागि शिक्षा र स्वास्थ्यलाई यसै बजेटमार्फत नि:शुल्क गर्न आग्रह गरेका हुन् ।

शुक्रवार एक विज्ञप्ति जारी गर्दै महरले शिक्षा र स्वास्थ्यलाई नि:शुल्क गरे राज्यको दायित्व पूरा हुनाका साथै संविधानमा उल्लेख गरिएको समाजवादको आधार निर्माण गर्न मदत पुग्ने उल्लेख गरे । 

राज्यका नीति निर्माण लोक कल्याणकारी नीतिमा बनाउनु पर्ने र बजेट मार्फत जनताले दैनिक जीवनदेखि राज्यका सबै क्षेत्रको विकासका सहयोग पुग्ने गरी बनाउनु पर्ने महर भनाइ छ।

यातायात र सञ्चारसेवालाई सहज र सरल बनाउन तथा कृषिलाई आधुनिकीकरण गर्ने र उद्यमशीलतासहितको रोजगारी सिर्जना हुने गरी बजेट विनियोजन गर्न पनि उनले आग्रह गरेका छन् ।