विराटनगर महानगरको कार्यपालिका निर्वाचनमा एमाले र स्वतन्त्र उम्मेदवार विजयी बनेका छन् । नेपाली कांग्रेस र जनता समाजवादी पार्टीको गठबन्धनका उम्मेदवार पराजित भए ।  

सो गठबन्धनलाई हराउँदै एमाले र स्वतन्त्र उम्मेदवारहरू कार्यपालिकामा निर्वाचित भएका छन् । 

महानगरको नगरपरिषदमा एमालेसँग उपप्रमुखसहित ४३ जना हुँदा कांग्रेससँग मेयरसहित ४० जना थिए । जसपाका १० जना जनप्रतिनिधि हुँदा स्वतन्त्र ३ र राप्रपाका १ जना थिए ।

कांग्रेस–जसपा गठबन्धनसँग ५० मत थियो भने एमालेले स्वतन्त्र र राप्रपासँग गठबन्धन गर्दा पनि ४७ मत मात्रै थियो । तर, जसपा र कांग्रेसका केही जनप्रतिनिधिले एमाले उम्मेदवारलाई मत दिँदा गठबन्धनका उम्मेदवार पराजित बनेका हुन् । 

जसपाबाट विद्रोह गरेर मेयरमा उठेका उमेश यादवले एमालेसँग गठबन्धन गरेका थिए । उनले जसपाका निर्वाचित जनप्रतिनिधिहरूलाई प्रभाव पारेको कांग्रेसको भनाइ छ । 

जसपाबाट निर्वाचित जनप्रतिनिधिको ३ भोटभन्दा बढी नआएको कांग्रेस विराटनगरका सभापति दीपक चापागाईँले बताए ।

मुख्य निर्वाचन अधिकृत भरत लम्सालका अनुसार कार्यपालिकामा  अल्पसंख्यकमा एमालेका दीपककुमार कर्ण ५२, स्वतन्त्र ओमप्रकाशकुमार साह  ५५ र स्वतन्त्र सञ्जीव साह ५२ मत ल्याएर विजयी भएका छन् ।  

अल्पसंख्यकमा कांग्रेसका प्रेम राठी ४०, जसपाका  ववितादेवी साह ४५ र जसपाकै विमलादेवी पोद्धार ४१ मत मात्रै पाए ।

महिलातर्फ सबै एमाले उम्मेदवार विजयी भएका छन् । एमालेका  सन्तलीदेवी विश्वास ५५ कमला श्रेष्ठ, ५५,  ताराकुमारी राय ५३ सरिता घिमिरे नेपाल ५३, खुश्बु विश्वकर्मा ५२ मत ल्याएर विजयी भए । 

कांग्रेसका पराजित  उम्मेदवारहरू अञ्जु दाहाल गौतमले ४०, गायत्री थापा ३९, रुपा देउजा ४०, विनितासिंह ठकुरी ४० र सूर्यादेवी साहले ४० मत मात्रै पाएका थिए ।