नेकपा एकीकृत समाजवादीका सम्मानित नेता तथा सांसद झलनाथ खनालले पूर्व सहमति अनुरूप नै पार्टीका मन्त्रीहरूलाई फेरबदल गर्न लागेको बताएका छन् ।

सोमवार संसद भवन नयाँ बानेश्वरमा सञ्चारकर्मीलाई संक्षिप्त प्रतिक्रिया दिँदै सांसद खनालले कुन व्यक्तिलाई मन्त्री बनाउने भन्ने कुरा पार्टीको सार्वभौम कुरा भएको बताए । उनले आफ्नो पार्टीको तर्फबाट कसलाई मन्त्री बनाउने भन्ने कुरा पार्टीले नै निर्णय गर्ने भन्दै धर्तीका अरु कुनै तागतले गर्न नसक्ने बताए ।

उनले ६ महिनासम्म एउटा समूह र त्यसपछि अर्को समूहलाई मन्त्रिपरिषद्मा पठाउने पार्टीमा पूर्व सहमति गरिएको स्पष्ट पारे ।

उनले भने, ‘कुन व्यक्तिलाई मन्त्री बनाउने या नबनाउने त्यो सम्बन्धित पार्टीको सार्वभौम कुरा हो, अरुले गर्ने होइन । हाम्रो पार्टीका तर्फबाट कसलाई मन्त्री बनाउने या नबनाउने भन्ने कुराको निर्णय नेकपा एकीकृत समाजवादीले गर्छ, यो धर्तीका अरु कुनै तागतले गर्ने कुरा होइन त्यो । हामीले पहिले नै सहमति त्यस्तै गरेका थियौं । ६ महिनासम्म एउटा टीमलाई दिने, त्यस पछाडि अर्को टीम पठाउने भन्ने शुरूकै हाम्रो सहमति हो । त्यही अनुसार हामीले गरेको हो । हामीले पार्टीको कमिटीमा सल्लाह गर्ने हो, कमिटीले निर्णय गर्छ । त्यसलाई पालना गर्नुपर्छ । हाम्रो पार्टीमा लाखौं सदस्यहरू हुनुहुन्छ । लाखौं सदस्यहरू भए पनि कमिटीहरूले निर्णय गर्छन् । त्यसलाई हामी सबैले पालना गर्छौं । पद्धति नै त्यही हो नि !’