प्रधानमन्त्री एवं नेपाली कांग्रेसका सभापति शेरबहादुर देउवाले लोकतान्त्रिक समाजवादी पार्टी (लोसपा)लाई सरकारमा सहभागी हुन आग्रह गरेका छन् । उनले बजेट लगत्तै संसदबाट नागरिकता विधेयक पारित गर्ने आश्वासन दिएका छन् । 

प्रधानमन्त्री निवास बालुवाटारमा मंगलवार बिहान लोसपाको ज्ञापनपत्र बुझ्दै देउवाले नागरिकता विधेयक संसदको यसै अधिवेशनबाट पारित गर्ने प्रतिबद्धता जनाएका हुन् । बालुवाटारमा देउवालाई भेटेका नेता उमाशंकर अरगरियाका अनुसार देउवाले लोसपाको मागअनुसार मुद्दा फिर्तामा पनि देउवा सकारात्मक देखिएका छन् । 

‘हामीले हाम्रो ज्ञापनपत्र वाचन गरेर र केही व्याख्यासहित बुझायौँ, प्रधानमन्त्रीले नागरिकता विधेयक पारित गर्ने प्रतिबद्धता जनाउनु भएको छ,’ अरगरियाले भने । सांसद रेशम चौधरीको रिहाइको सम्बन्धमा भने देउवाले अदालतमा विचाराधीन विषयमा सरकारले केही गर्न नसक्ने बताएका थिए । 

देउवाले संविधान संशोधनलगायत लोसपाका मागमा आफू सकारात्मक रहेको बताएका थिए । नेता अरगरियले सरकारमा जानेबारे पार्टीले निर्णय गरिनसकेको बताए । 

चुनावका तालमेलका लागि कांग्रेस र नेकपा एमाले दुवैले प्रस्ताव गरे पनि पार्टीले निर्णय नगरेको उनले बताए । भेटमा लोसपा अध्यक्ष महन्थ ठाकुर, नेता राजेन्द्र महतो र शरतसिंह भण्डारी सहभागी थिए । कांग्रेसको तर्फबाट उपसभापति पूर्णबहादुर खड्का पनि उपस्थित थिए । 

शनिवारको भेटमा देउवाले महन्थसँग सरकारमा सहभागी हुन आग्रह गरेका थिए । उपेन्द्र यादवको पार्टी जसपासँग रहेका दुई मन्त्रालय र उपसभामुख लिएर सरकारमा आउन देउवाले महन्थलाई आग्रह गरेका थिए ।

यस्तो छ ज्ञापनपत्रः