नेकपा एकीकृत समाजवादीका अध्यक्ष माधवकुमार नेपालले मन्त्री फेर्ने पार्टीको निर्णय कार्यान्वयन हुने बताएका छन् ।

आफ्नो पार्टीको निर्णयले अन्य पार्टीमा भूइँचालो गएको उनले टिप्पणी गरे । 

पार्टी निकट अखिलको कार्यक्रमलाई बुधवार काठमाडौंमा सम्बोधन गर्दै नेता नेपालले फिर्ता बोलाइएका मन्त्रीले पार्टी निर्णय कार्यान्वयन गर्ने विश्वास व्यक्त गरेका हुन् ।

‘हामीले पार्टीका तर्फबाट मन्त्रीमण्डलको फेरबदल गरेका छौं, ६ महिनाको अवधि दिइएकोमा ८ महिनासम्म समय दियौं । जसले राम्रो काम गरेका छन्, उनीहरूलाई धन्यवाद दिन चाहन्छौं,’ नेपालले भने, ‘पार्टीको निर्णय पालना गर्न तयार छौं भनेका छन्, मन्त्रीको लोभ छैन भनेका छन्, अन्यथा नसोचौं ।’ 

नेता नेपालले सरकारमा सहभागी मन्त्रीहरूले पार्टी निर्णय कार्यान्वयन गर्नेमा आशंका नगर्न आग्रह गरे । ‘पार्टीले निर्णय गर्‍यो किन लागू भएको छैन भन्ने प्रश्न छ, हाम्रो पार्टीले निर्णय गरेपछि अन्य दलमा भूकम्प चल्यो,’ नेपालले भने, ‘अन्य दलले पनि केही दिनको मौका दिनुस् भनेका होलान् । अब जाने हाम्रो टीमले राम्रो काम गरोस् ।’ 

यसअघि नेकपा एसले सरकारमा सहभागी ४ मन्त्रीलाई फिर्ता बोलाएर नयाँलाई पठाउने निर्णय गरेको थियो तर नयाँ मन्त्रीको शपथ हुन सकेको थिएन ।