नेकपा विभाजनको डेढ वर्षपछि नेकपा एमालेका अध्यक्ष केपी शर्मा ओली र नेकपा माओवादी केन्द्रका प्रभावशाली नेता नारायणकाजी श्रेष्ठबीच घण्टौं लामो कुराकानी भएको छ ।

ओली निवास बालकोटमा आइतवार २ नेताबीच भेटवार्ता भएको हो । आइतवार साँझ २ नेताबीच लामो कुराकानी भएको ओली निवास बालकोट स्रोतले पुष्टि गरेको छ । 

नेकपा एमालेको सचिवालय बैठकको अघिल्लो दिन भएको भेटवार्तालाई अर्थपूर्ण मानिएको छ । स्थानीय तह चुनावको समीक्षा र प्रतिनिधिसभा चुनावको रणनीति बनाउन एमाले सचिवालयको बैठक बस्नुअघि भएको भेटलाई एमाले र माओवादी केन्द्रका नेताहरू चासोपूर्वक सोधीखोजी गरिरहेका छन् ।

माओवादीभित्र नारायणकाजीले चुनावमा वामपन्थी तालमेल गरेर जानुपर्ने लबिङ गर्दै आएका छन् । ‘एकपटकको प्रतिगामी सधैं प्रतिगामी नहुने’ भन्दै सच्चिएर आए एमालेसँग सहकार्य गर्न सकिने भन्दै संसदमा श्रेष्ठले भाषण गरेका थिए । 

आइतवार पनि श्रेष्ठले वामपन्थी तालमेल गरेर चुनावमा जान प्रस्ताव गरेको स्रोतको दाबी छ । 

माओवादीभित्र प्रचण्डसँग असहमति राखिरहेका श्रेष्ठले ओलीसँग भेटवार्ता गर्नुले पनि माओवादीभित्र तरङ्ग सिर्जना गरेको छ । 

ओलीसँगको भेटमा वामपन्थी एकताबाहेक परराष्ट्र सम्बन्धबारे पनि कुराकानी भएको बालकोट स्रोतले बताएको छ ।

सरकारले अमेरिकासँग बढाएको हिमचिम र नेपालमा भइरहेको चीन विरोधी गतिविधिका विषयमा २ नेताले समीक्षा गरेको बालकोट स्रोतले जानकारी दियो तर २ नेता बीचको छलफलमा कुनै निष्कर्ष भने नआएको बताइएको छ ।  

प्रतिनिधिसभा निर्वाचनको मितिबारे चर्चा भइरहँदा चुनावमा वामपन्थी तालमेल गर्न भित्रभित्रै प्रयास भएका छन् । नेकपा एसभित्र झलनाथ खनालले वामपन्थी तालमेलको वकालत गरिरहेका छन् । 

आइतवार नै नेकपा एमालेका एक उपमहासचिव प्रदीप ज्ञवाली र माओवादी नेता वर्षमान पुनः बीच पनि छलफल भएको स्रोतको दाबी छ । वामपन्थी गठबन्धनका लागि भित्रभित्र गृहकार्य भइरहे पनि एमाले अध्यक्ष केपी ओलीले बाहिर तालमेल नहुने बताउँदै आएका छन् ।