प्रदेश र संघ निर्वाचनको तयारी, भोलिबाट मतदाता नामावली संकलन गरिने

आसन्न प्रतिनिधि सभा र प्रदेश सभा निर्वाचनका लागि भोलि (बुधवार) देखि देशभर मतदाता नामावली संकलन तथा अद्यावधिक कार्य शुरू हुने भएको छ । 

निर्वाचन आयोगले मंगलवार पत्रकार सम्मेलन गरेर उक्त कुराको जानकारी दिएको हो । 

निर्वाचन आयोगका प्रवक्ता शालिग्राम शर्मा पौडेलले मतदाता नामावली अद्यावधिक गर्न छुटेको अवस्थामा स्थायी ठेगाना बाहेक अन्य जिल्लाबाट पनि नाम दर्ता गराउन सकिने जनाएका छन् । 

योग्यता पुगेका सबैले आफ्नो प्रमाणसहित निवेदन दिएमा अस्थायी बसोबास गरिरहेको ठाउँको निर्वाचन कार्यालयबाट समेत नामावली अद्यावधिक गर्न सकिने उनले बताए । साविकमा कुनै ठाउँमा रहेको नामावली हाल बसाइँ सरेर अन्य स्थायी ठेगाना भएको अवस्थामा उक्त स्थानमा पनि नामावली स्थान्तरण गराउन सकिने उनको भनाइ छ । 

निकट भविष्यमै एकै चरणमा प्रतिनिधि सभा र प्रदेश सभाको निर्वाचन गराउने निर्वाचन आयोगको तयारी रहेको प्रवक्ता पौडेलले जानकारी दिए ।