म रक्षामन्त्री हुँदा अमेरिकाले एसपीपीको प्रस्ताव गरेन : भीमसेनदास प्रधान

नेपाली कांग्रेसका सांसद भीमसेनदास प्रधानले आफू रक्षामन्त्री हुँदा अमेरिकाले स्टेट पार्टनरशिप प्रोग्राम (एसपीपी) को प्रस्ताव नगरेको बताएका छन् ।

बिहीवार संसद भवन नयाँबानेश्वरमा सञ्चारकर्मीसँग कुराकानी गर्दै पूर्व रक्षामन्त्री समेत रहेका सांसद प्रधानले सन् २०१७ मा आफू रक्षामन्त्री रहेको र आफ्नो कार्यकालमा अमेरिकाले स्टेट पार्टनरशिप प्रोग्राम (एसपीपी) को प्रस्ताव नगरेको स्पष्ट पारे ।

उनले सन् २०१९ मा एमाले नेतृत्वको सरकारमा रक्षामन्त्री ईश्वर पोखरेल हुँदाखेरी सो विषयको छलफल अगाडि बढेको दाबी गरे । उनले प्रधानमन्त्री शेरबहादुर देउवाले गृहमन्त्री बालकृष्ण खाँणमार्फत एसपीपी सम्झौता नगर्ने प्रतिबद्धता गर्नु सकारात्मक भएको बताए ।

‘हामीले आफ्नो नजिकको छिमेकीलाई विश्वासमा नलिइकन कुनै पनि तेस्रो व्यक्तिसँग सम्झौता गर्दा एकदम हेक्का राख्नुपर्छ, हामीले भारत र चीनलाई कुनै हालतमा पनि विश्वासमा नलिइकन अर्को काम गर्नु हुँदैन । त्यसले नेपाललाई युक्रेन बन्न पनि बेर लाग्दैन छिमेकीसँग द्वन्द्व हुँदाखेरी ।’