सभामुख अग्नि सापकोटाले इन्धनमा भएको मूल्यवृद्धिबारे संसदमा जवाफ दिन सरकारलाई निर्देशन दिएका छन् । 

प्रमुख प्रतिपक्षी दल नेकपा एमालेले मूल्यवृद्धिबारे सरकारको जवाफ माग गर्दै संसद अवरुद्ध गर्ने चेतावनी दिएपछि सभामुखले रुलिङ गरेका हुन् । 

‘प्रतिपक्षी दलका माननीय सदस्यले उठाउनु भएको विषयमा मेरो ध्यानाकर्षण भएको छ, यसबारे सरकारको ध्यानाकर्षण गराउन चाहन्छु । यस विषयमा सत्यतथ्य सदनसमक्ष पेश गर्न निर्देश गर्छु,’ सापकोटाले भने । 

त्यसअघि एमाले सचिव पद्मा अर्यालले मूल्यवृद्धिबारे सरकारले जनतालाई चित्तबुझ्दो जवाफ नदिए सदन चल्न नदिने चेतावनी दिएकी थिइन् । 

नेपाल आयल निगमले आइतवार मध्यरातदेखि लागू हुने गरी इन्धनको मूल्यवृद्धि गरेको थियो ।