जननेता मदन भण्डारीको ७१औं जन्मजयन्तीका अवसरमा मदन भण्डारी फाउन्डेसनले साताव्यापी विविध कार्यक्रम शुरू गरेको छ ।

नेकपा एमालेका तत्कालीन महासचिव भण्डारीको असार १४ गते पर्ने जन्मदिनका अवसरमा फाउन्डेसनले शनिवारदेखि असार १६ गतेसम्मका कार्यक्रम तय गरेको फाउन्डेसनका सचिव पेम्बा लामाले जानकारी दिए ।

नेता भण्डारीको विचार ‘जनताको बहुदलीय जनवाद’ र उनको व्यक्तित्वका अनेक पक्षलाई फाउन्डेसनले उजागर र प्रवद्र्धन गर्दै आएको छ । 

सचिव लामाका अनुसार साताव्यापी कार्यक्रमअन्तर्गत शुक्रवार मदन भण्डारी कलेजमा छलफल शृंखला र रक्तदान कार्यक्रम आयोजना गरेको थियो । कार्यक्रममा एमालेका वरिष्ठ उपाध्यक्ष ईश्वर पोखरेल सहभागी भएका थिए ।

शनिवार कीर्तिपुरमा प्राज्ञिक अन्तरसंवाद, असार १२ गते सञ्चारकर्मीसँग अन्तक्र्रिया, १३ गते नेपालमा सडक सुरक्षाबारे संवाद, १४ गते राष्ट्रिय सभागृहमा एमाले अध्यक्ष केपी शर्मा ओलीको उपस्थितिमा मूल समारोहको कार्यक्रम एवं मदन भण्डारी राष्ट्रिय पुरस्कार वितरण, १५ गते राष्ट्रिय गीत तथा ‘श्वेतशार्दुल’को पाँचौं अंकको सार्वजनीकरण तथा असार १६ गते ज्येष्ठ कम्युनिष्टलाई सम्मानको कार्यक्रम तय गरिएको छ । 

विक्रम संवत् २०५० जेठ ३ गते भण्डारी र संगठन विभागका तत्कालीन प्रमुख जीवराज आश्रितको पोखराबाट चितवनको कार्यक्रममा जाने क्रममा दासढुंगामा जीप दुर्घटनामा परी निधन भएको थियो ।