नेकपा एमालेका महासचिव शंकर पोखरेलले एमालेप्रति घृणाको राजनीतिले समाजवाद नआउने टिप्पणी गरेका छन् । गठबन्धनको राजनीतिको दृष्टान्त एमालेलाई घेराबन्दीमा पार्न भएको उनले दाबी गरे । 

कम्युनिस्ट संस्थापक नरबहादुर कर्मचार्यको स्मृतिमा सोमवार ललितपुरमा आयोजित कार्यक्रममा महासचिव पोखरेलले अहिलेको सत्ता गठबन्धन समाजवादमा जाने बाधक रहेको बताएका हुन् । 

एमालेलाई घेराबन्दी भएको समयमा आफूलाई कार्यक्रममा बोलाएको भन्दै पोखरेलले माओवादी नेता नारायणकाजी श्रेष्ठलाई धन्यवाद पनि दिए । 

‘गठबन्धनले एमालेप्रति घृणाको राजनीति गरिरहेको छ, एमालेलाई हराउनु परेको छ,’ माओवादी केन्द्रका अध्यक्ष पुष्पकमल दाहाल प्रचण्ड उपस्थित कार्यक्रममा पोखरेलले भने, ‘समाज निर्माण गर्ने हो भने भविष्यका प्रश्नमा बहस गर्नुपर्छ, वामपन्थी दलबीच घृणाको राजनीति गर्नु पर्दैन ।’

पोखरेलले अहिलेको सत्ता गठबन्धनले देशलाई गलत बाटोमा हिँडाएको आरोप लगाए । ‘९ महिनाको अन्तरलाई हेरेर गठबन्धन सही बाटोमा छ छैन बुझ्नुस् । एमाले सरकारमा छँदा विदेशी मुद्राको सञ्चिति ११ महिनाको आयात धान्ने थियो, अहिले सामर्थ्य ६ महिनामा झरेको छ । बाटो सही छ कि छैन आफैँ छुट्याउनुस्,’ पोखरेलले भने, ‘कोभिडको लकडाउनको समयमा भन्दा अहिले पुँजीगत खर्च कम छ ।’ 

संकटपूर्ण अर्थतन्त्रलाई निकास दिन गठबन्धन असफल भएको उनले बताए ।