मंगलवार बिहान विभिन्न प्रदेशमा हल्कादेखि मध्यम वर्षा भइरहेको मौसम विभागले जनाएको छ ।

विभागका अनुसार, अहिले कर्णाली र मधेस प्रदेशका एक दुई स्थान र बाँकी प्रदेशका केही स्थानमा मेघगर्जन, चट्टयाङ्ग सहित हल्का देखि मध्यम वर्षा भइरहेको छ ।

हाल देशको प्रदेश नं १  लुम्बिनी प्रदेश र सुदूरपश्चिम प्रदेशमा सामान्यदेखि पूर्ण बदली भएको छ भने बाँकी प्रदेशमा आँशिकदेखि सामान्य बदली रहेको विभागको भनाइ छ ।

अहिले देशभर मनसुनी वायुको प्रभाव रहेको विभागले जनाएको छ ।  

आज दिउँसो तथा रातिसम्म देशभर सामान्यदेखि पूर्ण बदली रहनेछ ।  

देशका धेरै स्थानहरूमा हल्कादेखि मध्यम वर्षाको सम्भावना रहेको विभागको भनाइ छ ।

आज दिउँसो तथा रातिसम्म नै प्रदेश १, मधेश प्रदेश, बागमती प्रदेश, गण्डकी प्रदेश, लुम्बिनी प्रदेशका थोरै र सुदुर पश्चिम प्रदेशका एक–दुई स्थानमा भारी वर्षाको पनि सम्भावना रहेको विभागले जनाएको छ ।

कतिपय स्थानमा भारी वर्षाको सम्भावना रहेको समेत विभागले जनाएको छ । 

विभागका अनुसार, आगामी २४ घण्टासम्म पहाडी भूभागमा भूक्षय, पहिरो तथा गेग्रान बहावको जोखिम रहेको छ ।

यस्तै नदी नाला तथा खहरे खोलाहरूमा पानीको सतह बढ्न सक्ने तथा दैनिक जन जीवनर यातायात क्षेत्र समेत प्रभावित हुन सक्ने भएकोले आवश्यक सतर्कता अपनाउन विभागले आग्रह गरेको छ ।