बाँकेको जमुनाहा नाकाबाट नियन्त्रणमा लिइएको २५० बोरा शंकास्पद वस्तु भाँगोको गेडा भएको प्रहरीले जनाएको छ । 

भारततर्फ जाँदै गरेको भारतीय कन्टेनर शुक्रवार बिहान प्रहरीले नियन्त्रणमा लिएको थियो । 

जिल्ला प्रहरी कार्यालय बाँके प्रमुख प्रहरी उपरीक्षक (एसपी) श्यामकृष्ण अधिकारीका अनुसार बिहान नेपालबाट भारततर्फ जाँदै गरेको कन्टेनर शंका लागेर जाँच गर्दा उक्त वस्तु फेला परेको हो । 

‘गाँजाको बोटमा फल्ने गेडा फेला परेको हो । सामान्यतया यो अचार खान प्रयोग गर्ने भन्ने बुझिएको छ,’ एसपी अधिकारीले लोकान्तरसँग भने, ‘तर यो के हो ? केका लागि प्रयोग हुन्छ ? भन्ने कुरा परीक्षणपछि मात्र खुल्ला ।’

उनका अनुसार यो पहाडी जिल्ला बागलुङबाट ल्याइएको हो । कसरी त्यति ठूलो परिणाममा भारतसम्म पुग्छ भन्ने विषयमा प्रहरीले अनुसन्धान गरिरहेको छ । बरामद भएको गेडाको बारेमा भन्सार विभागले पनि अनुसन्धान गरिरहेको छ ।

बरामद गेडाको बजार मूल्य ५० लाख र गाडीको मूल्यसहित १ करोडभन्दा धेरै मूल्य बराबरको सामान बरामद गरेको एसपी अधिकारीले बताए । 

उनका अनुसार भारतीय सीमानाकामै भएकाले चालक र सहचालक भारततर्फ भागेका छन् । भारतीय प्रहरीको सहयोगमा उनीहरूको खोजी भइरहेको उनले बताए । 

जाँचै हुँदैन !

भारतबाट सामान लिएर नेपाल आएका ट्रक, लहरी र कन्टेनर नेपालको भन्सारमा जाँच हुँदैन । त्यसको फाइदा उठाएर विभिन्न सामानहरू नेपालबाट भारत तस्करी हुने गरेको छ । 

शुक्रवार बरामद भएको भाँगोको गेडा पनि भन्सारले जाँच नगर्दा भारत जान लागेको थियो । 

‘सामान्यतया भारतबाट नेपाल सामान ल्याएर आएका ट्रकहरू फर्किँदा जाँच हुने गरेको छैन,’ एसपी अधिकारीले लोकान्तरसँग भने, ‘एकले अर्कालाई दोष लगाउनुभन्दा पनि तस्करहरूले यसको फाइदा उठाएर भारततर्फ तस्करी गर्ने गरेको देखिन्छ । ’

प्रहरी अधिकारीहरूका अनुसार नेपाली भन्सारको हेलचेक्य्राइँले गर्दा नेपालबाट भारततर्फ सामानहरू तस्करी हुने गरेको छ ।