सशस्त्र प्रहरी परिवार महिला संघले आफ्नो २१औं वार्षिकोत्सवको पुनित अवसरमा शुक्रवार सशस्त्र प्रहरी बल नेपाल प्रधान कार्यालयमा संघद्वारा आयोजित विशेष समारोहको महिला, बालबालिका तथा ज्येष्ठ नागरिक मन्त्री उमा रेग्मीले पानसमा दीप प्रज्वलन गरी उद्घाटन गरेकी छन् ।

मन्त्री रेग्मीले संघले समाज सेवाको क्षेत्रमा सक्रिय रहँदै पुर्‍याएको योगदानको प्रशंसा गर्दै सबै मिलेर समाज सेवाको क्षेत्रमा कार्य गरेमा मुलुक तथा समाजको विकासमा टेवा पुग्ने बताइन् ।

उनले देश विकाससँगै समतामूलक समाज निर्माणको लागि महिला र पुरुष दुवैको महत्त्वपूर्ण भूमिका रहने चर्चा गर्दै राष्ट्रसेवामा समर्पित सशस्त्र प्रहरी कर्मचारीका परिवारको हकहित र सीप विकासमा महत्त्वपूर्ण योगदान पुर्‍याउन सशस्त्र प्रहरी परिवार महिला संघले खेलेको अहम भूमिका प्रशंसनीय रहेको बताइन् ।

त्यसअवसरमा मन्त्री रेग्मीले विभिन्न निकायमा रहेर समाज सेवाको क्षेत्रमा विशिष्ट योगदान पुर्‍याउने तथा संघको विविध क्रियाकलापमा सहयोग पुर्‍याउने महानुभावलाई कदरपत्र तथा प्रशंसापत्र प्रदान गरिन् ।
।

कार्यक्रममा सशस्त्र प्रहरी महानिरीक्षक राजु अर्यालले उत्कृष्ट कार्य गर्ने सशस्त्र प्रहरी महिला राष्ट्रसेवक तथा नेपाल एपीएफ स्कूल कीर्तिपुरकी उत्कृष्ट महिला शिक्षकलाई प्रशंसापत्र प्रदान गरे ।

कार्यक्रममा सशस्त्र प्रहरी परिवार महिला संघकी केन्द्रीय अध्यक्ष अनिता अर्यालले धन्यवाद ज्ञापनको क्रममा समाजसेवाको कार्य एक मात्र व्यक्ति वा सस्थाको एकल प्रयासले मात्र नभई समाजमा क्रियाशिल विभिन्न संघसंस्थाबीच समेत हातेमालो र समन्वय आवश्यक रहेको चर्चा गर्दै समाज सेवामा आवद्ध संघसंस्थासँग सहकार्य तथा समन्वय गर्दै सशस्त्र प्रहरी परिवार महिला संघ आफ्नो स्थापनाकालदेखि नै निरन्तर समाज सेवामा क्रियाशिल रहँदै आएको बताइन् ।

त्यसै अवसरमा उनले नेपाल एपीएफ स्कूलका विभिन्न विद्यामा उत्कृष्ट ठहरिएका विद्यार्थी तथा वीरगती प्राप्त सशस्त्र प्रहरी कर्मचारीका जेहेन्दार सन्ततीलाई छात्रवृत्ति स्वरूप जनही नगद १० हजार र प्रशंसापत्र तथा सशस्त्र प्रहरी बल नेपालका राष्ट्रसेवक कर्मचारीका सन्ततीमध्ये माध्यमिक शिक्षा परीक्षामा उत्कृष्ट अंक ल्याउने छात्रछात्रालाई समेत जनही १० हजार रुपैयाँ राशीको छात्रवृत्तिसहित प्रमाणपत्र प्रदान गरिन् ।

कार्यक्रममा संघकी उपाध्यक्ष सावित्राकुमारी पौडेलले स्वागत मन्तव्य व्यक्त गर्दै संघले समाज सेवाको भावनामा ओतप्रोत रहँदै योगदान पुर्‍याइरहेको बताइन् ।

कार्यक्रममा संघकी सदस्य सचिव तुलमाया ठाडामगरले संघको गतिविधि र भावी योजनाबारे चर्चा गर्दै सशस्त्र प्रहरी परिवार महिला संघको नाम ‘सशस्त्र प्रहरी परिवार संघ’ राखिने र सशस्त्र प्रहरी कर्मचारीका श्रीमान वा श्रीमती दुवै संघमा आवद्ध हुने व्यवस्था मिलाउने योजना रहेको समेत जानकारी गराइन् ।

त्यसअवसरमा सशस्त्र प्रहरी अतिरिक्त महानिरीक्षकद्वय नारायणदत्त पौडेल र चन्द्र प्रकाश गौतम, विभिन्न संघ संस्थाका विशिष्ट महानुभाव, सशस्त्र प्रहरी परिवार महिला संघका पदाधिकारी लगायत सशस्त्र प्रहरी कर्मचारीको उपस्थिति थियो ।