नेपालको भ्रमणमा रहेका चिनियाँ कम्युनिष्ट पार्टी (सीपीसी) का विदेश विभाग प्रमुख लिउ जियान्चाओ र नेकपा एमालेका अध्यक्ष केपी शर्मा ओलीबीच भेटवार्ता भएको छ । 

चार दिने भ्रमणका क्रममा आइतवार नेपाल आएका विदेश विभाग प्रमुख लिउ ओलीलाई भेट्न मंगलवार बिहान उनकै निवास बालकोट पुगेका हुन् । 

दुई नेताबीच नेपाल–चीन आपसी हितका साथै चिनियाँ कम्युनिष्ट पार्टी र एमालेको सम्बन्धलगायतबारे छलफल भएको बताइएको छ । 

भेटवार्तामा एमाले नेताहरू राजन भट्टराई, विष्णु रिमाल, प्रदीप ज्ञवाली, उषाकिरण भण्डारी, अन्जन शाक्यलगायत संलग्न छन् । 

आइतवार नेपाल आएलगत्तै विदेश विभाग प्रमुख लिउले प्रधानमन्त्री तथा नेपाली कांग्रेसका सभापति शेरबहादुर देउवा र परराष्ट्रमन्त्री नारायण खड्कासँग भेटवार्ता गरेका थिए । उनले सोमवार माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेट गरेका थिए । 

बुधवार चीन फर्किनुअघि लिउले राष्ट्रपति विद्यादेवी भण्डारी, एकीकृत समाजवादीका अध्यक्ष माधवकुमार नेपाल र सोही पार्टीका सम्मानित नेता झलनाथ खनालसँगपनि भेट्न कार्यक्रम रहेको चिनियाँ दूतावासले जनाएको छ ।