नागरिकता विधेयकमा तीन सांसदले विरोधको सूचना दर्ता गरेका छन् । नेकपा एमालेका सांसदहरु भीमबहादुर रावल र शेरबहादुर तामाङसहित नेपाल मजदुर किसान पार्टी (नेमकिपा)का सांसद प्रेम सुवालले मंगलवार विरोधको सूचना दर्ता गरेका हुन् ।

एमाले सांसद रावलले राज्य व्यवस्था समितिले व्यापक छलफल गरेर प्रतिवेदन पेश गरिसकेको अवस्थामा विधयेक फिर्ता लिएर नयाँ ल्याउनु राज्य व्यवस्था समितिकै अवहेलना भएको भन्दै विरोधको सूचना दर्ता गराएको बताएका छन् । 

लैंगिक पहिचानसहित आमा वा बाबुको नामबाट नागरिकता प्राप्त गर्ने मर्मविपरीत भएकोलगायतका विषय उठाएर विरोधको सूचना दर्ता गरेको अर्का सांसदले तामाङले जानकारी दिएका छन् । 

नेमकिपाका सांसद सवालले भने खुला सीमा नियमन गर्नुपर्ने, संघ र प्रदेशको अलग अलग नेपाली नागरिकताको व्यवस्था गर्नुपर्ने लगायतका माग राखेर विरोधको सूचना दर्ता गरेका छन् । 

सरकारले यसअघि केपी ओली नेतृत्वको सरकारले २०७५ मा दर्ता गराएको नागरिकतासम्बन्धी विधेयक फिर्ता लिएर नयाँ विधेयक दर्ता गराएको छ । जसमाथि सैद्धान्तिक छलफल शुरू भएको छैन । 

मधेशवादी दलहरुले यसअघिको विधेयक फिर्ता लिएकोमा विरोध जनाइरहेका छन् ।