नेपाली कांग्रेसका सांसद जितेन्द्र नारायण देवले नेपाल श्रीलंकाजस्तो आर्थिक संकटतर्फ नगएको दाबी गरेका छन् । 

मंगलबार राष्ट्रियसभाको बैठकको विशेष समयमा बोल्दै उनले नेपाल श्रीलंकाजस्तो आर्थिक संकटतर्फ नगएको दाबी गरेका हुन् । यद्यपि, नेपालले पनि सतर्कता भने अपनाउनु पर्ने उनको सुझाव छ । ‘श्रीलंका के कति कारणले यहाँसम्म आइपुग्यो, त्यसको अध्ययन गर्न जरुरी छ,’ उनले भने, ‘म यो कुरामा ढुक्क छ कि नेपाल त्यतातिर भने गइराखेको छैन ।’

पछिल्लोसमय प्रमुख राजनीतिक दलका नेताहरूले नै मुलुक श्रीलंकाको बाटोमा गइरहेको अभिव्यक्ति दिइरहेका छन् । सांसद देवले हल्ला गरिएजस्तो नेपाल श्रीलंकाको बाटोमा नरहेको भन्दै गैर जिम्मेवार अभिव्यक्ति नदिन सबैलाई आग्रह गरे । 

उनले कोभिड तथा रसिया–युक्रेनको युद्धलाई देखाएर समस्याबाट पन्छिन खोज्नु मुर्खता भएको बताएका छन् । यो देशप्रति गद्दारी हुने उनको तर्क छ । 

सांसद देवले श्रीलंकाले दुई दशकदेखि निरन्तर गलत आर्थिक नीति अपनाउँदै आएको दाबी गरेका छन् । त्यस्तै भ्रष्टाचार, कमिशनतन्त्र र परिवारवादको कारणले गर्दा श्रीलंकाको अहिलेको हालत भएको उनको भनाइ छ । 
उनले नेपालले कस्तो किसिमको ऋण लिने र कस्तो नलिने भन्ने विषयमा अर्थशास्त्री, राज्य सञ्चालक र मुख्य राजनीतिक शक्तिहरूका बीचमा बहस हुनुपर्ने बताए । सरकारले अहिले लिएको आर्थिक नीति सही भएको उनको दाबी छ । अहिलको नीतिले उत्पादन र निर्यात बढाउने तथा आयात घटाउने उनको विश्वास छ ।