नेपाली कांग्रेसका केन्द्रीय सदस्य मोहनबहादुर बस्नेतले आगामी निर्वाचनमा आफूले सिन्धुपाल्चोकबाट प्रतिनिधिसभा सदस्यको टिकट पाउनुपर्ने दाबी गरेका छन् । 

नेपाली कांग्रेसको केन्द्रीय समिति बैठकमा बोल्दै बस्नेतले अन्यत्र गठबन्धन भए पनि सिन्धुपाल्चोकमा आफूले टिकट पाउनुपर्ने दाबी गरेका हुन् । 

सत्तारूढ गठबन्धनले चुनावी तालमेल गर्दा सभामुख अग्नी सापकोटालाई टिकट दिएर आफूलाई बञ्चित गर्ने डरमा रहेका बस्नेतले आफ्नो टिकट नखोस्न अहिल्यैबाट चेतावनी दिएका छन् ।

सापकोटा र बस्नेतको निर्वाचन क्षेत्र एउटै हो । उनीहरू सिन्धुपाल्चोकको क्षेत्र नम्बर–१ बाट उम्मेदवार हुँदै आएका छन् । अघिल्लो पटक वाम तालमेल हुँदा सापकोटा विजयी भएका थिए भने बस्नेत दोस्रो भएका थिए । 

केन्द्रीय समिति बैठकमा बस्नेतले भने, ‘म गठबन्धनको विपक्षमा छैन । प्रदेश र प्रतिनिधिसभाको चुनावमा पनि गठबन्धन गरौँ । तर, मेरो निर्वाचन क्षेत्र सिन्धुपाल्चोकमा मेरो सिट धरापमा प¥यो र म उमेदवार बन्न पाइनँ भने त्यहाँ विद्रोह हुन्छ ।’

बस्नेतले २०७४ मा निर्वाचन हारेदेखि नै उनले आगामी निर्वाचनको तयारी गरिरहेका छन् । उनी सोही निर्वाचन क्षेत्रबाट २०५४ र २०७० मा गरेर दुई पटक सांसद निर्वाचित भएका थिए । 

२०७० मा निर्वाचन जितेपछि उनी सञ्चारमन्त्री समेत बनेका थिए । २०६४ मा भने उनी माओवादी उम्मेदवारसँग पराजित भएका थिए ।

आगामी चुनावबाट बस्नेत कुनै पनि हालतमा सांसद बन्ने तयारीमा लागेका छन् । 

सिन्धुपाल्चोकमा एमाले र माओवादी केन्द्रले चुनावी तालमेलेको प्रयास गरिरहेको छ । देशभर अन्यत्र जेसुकै भए पनि सिन्धुपाल्चोकमा भने वामपन्थी गठबन्धन बनाउने एमालेको प्रयास छ ।