आज यी ९ जिल्ला भई बहने नदीहरूको बहाव बढ्न सक्ने, सतर्कता अपनाउन विभागको आग्रह

आज (बिहीवार) दोलखा, सिन्धुपाल्चोक, रसुवा, धादिङ लगायत क्षेत्र भई बहनेससाना नदीहरूमा बहाव बढ्न सक्ने जल तथा मौसम विज्ञान विभागले जनाएको छ ।

यी जिल्लाहरूसँगै रुकुम पश्चिम, सल्यान, दैलेख, बैतडी, डडेलधुरा र आसपासका क्षेत्र भई बहने नदीहरूमा पनि बहाव बढ्ने विभागको पूर्वानुमान छ । 

यी नदीहरूमा आकस्मिक वहाव समेत हुन सक्ने भन्दै सचेत रहन विभागले आग्रह गरेको छ । 

यस्तै आज बिहानको मापन अनुसार कोशी, नारायणी, कर्णाली, महाकाली, कन्काई, कमला, बागमती, पूर्वी राप्ती, पश्चिम राप्ती, बबई र यसका सहायक नदीहरूको बहाव सतर्कता तहभन्दा तल नै रहेको विभागले जनाएको छ ।

विभागले आगामी ३ दिनसम्म प्रमुख नदीहरूको बहाव सतर्कता तहभन्दा तल रहने पूर्वानुमान गरेको छ । 

यस्तै साउन ३ गतेदेखि ५ गतेसम्म देशभरका नदीहरूमा बहाव उल्लेख्य बढ्ने पूर्वानुमान विभागको छ ।