नेपाल विद्यार्थी संघ (नेविसंघ)ले गभर्नर महाप्रसाद अधिकारीले तत्काल राजीनामा नदिए आन्दोलन चर्काउने चेतावनी दिएको छ । आइतवार राष्ट्र बैंकमा धर्ना दिएको कांग्रेसनिकट नेविसंघले गभर्नर अधिकारीलाई २४ घण्टाभित्र राजीनामा दिन चेतावनी दिएको हो । 

धर्ना कार्यक्रमलाई सम्बोधन गर्ने क्रममा नेविसंघ सभापति दुजाङ शेर्पाले गभर्नर अधिकारीले २४ घण्टाभित्र राजीनामा नदिए आन्दोलन चर्काउने चेतावनी दिए । उनले राजनीतिक पदमा रहेको व्यक्ति गभर्नर हुन नपाउने भन्दै तत्काल राजीनामा गर्न चेतावनी दिए । गर्भनर अधिकारीले राजीनामा नदिएसम्म आन्दोलन जारी रहने उनले बताए । 

गभर्नर अधिकारी नेकपा एमालेको अर्थ तथा योजना विभागका सदस्य भएको सार्वजनिक भएपछि उनको राजीनामा माग भइरहेको छ । एमालेले विभाग सदस्यमा ‘एम अधिकारी’लाई नियुक्त गरेको छ । उक्त एम अधिकारी गर्भनर अधिकारी भएको दाबीसहित उनीविरुद्धको आन्दोलन चर्किदै गएको छ । सत्तारुढ दलका भ्रातृ संगठनहरूले गभर्नरले राजीनामा दिनुपर्ने भन्दै आन्दोलन चर्कारहेका छन् ।