रूपन्देहीको तिलोत्तमा नगरपालिकाको नगरसभा स्थगित भएको विरोधमा एमालेबाट निर्वाचित जनप्रतिनिधि विरोध प्रदर्शन गर्दै नाराबाजी गरेका छन् । नगरप्रमुख रामकृष्ण खाँणले बैठकको गणपूरक संख्या नपुगेको भन्दै आइतवार नगरसभा स्थगित गर्ने निर्णय सुनाएका थिए । 

नाराबाजीपछि त्यहाँ सुरक्षाकर्मी परिचालन गरिएको छ । एमालेका जनप्रतिनिधिहरूलाई हाजिर गर्नबाट बन्चित गरेको भन्दै प्रमुख प्रशासकीय अधिकृत जीवन ज्ञवालीविरुद्ध नाराबाजी गरे । हाजिर गर्न नदिई रजिस्टर कब्जा गरेर बैठक स्थगित गरेको एमालेको आरोप छ । 

बैठकको प्रारम्भमा एमालेबाट निर्वाचित जनप्रतिनिधिमध्ये ४२ जनाले हाजिर गरेका थिए । उपस्थित भए पनि नेपाली कांग्रेसबाट निर्वाचित जनप्रतिनिधिले हाजिर गरेका थिएनन् । उप प्रमुख जगेश्वरी चौधरीले सभामा उपस्थित भएका नगरसभा सदस्यहरूलाई षड्यन्त्रपूर्वक उपस्थिति पुस्तिकामा हाजिर गर्न नदिई स्थगित गरेको बताइन् । 

गत शुक्रवार पनि आयोजना गरिएको बैठक गणपूरक संख्यामा नपुगेको भन्दै स्थगन भएको थियो । पटक–पटक विवादका कारण नगरसभा स्थगित हुँदा तिलोत्तमाको बजेट पारित हुन सकेको छैन ।