नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को सचिवालयले भारतको भ्रमण फलदायी भएको बताएको छ । 

आइतवार भारतको भ्रमण सम्पन्न गरी प्रचण्ड स्वदेश फर्केका छन् । उनी गत शुक्रवार भारतीय जनता पार्टीका अध्यक्ष जेपी नाड्डाको निमन्त्रणमा तीनदिने भारत भ्रमणका लागि नयाँदिल्ली पुगेका थिए । 

प्रचण्डका सहयोगी रमेश मल्लले भारत भ्रमण फलदायी भएको बताएका छन् । उनले ट्वीटरमा लेखेका छन्, ‘भाजपा अध्यक्ष जेपी नड्डा ज्युसँगको भेटवार्तासँगै अध्यक्ष कमरेड प्रचण्डको भारतको तीन दिने सद्भावना भ्रमण सफलतापूर्वक सम्पन्न भएको छ । पार्टी टु पार्टी सम्बन्धका दृष्टिले पहिलो र देश–देश बीचको सुदृढ सम्बन्ध विस्तारको लागि सहयोगी यो भ्रमण देश र पार्टीको लागि फलदायी बनेको छ ।’ 

भारत भ्रमणका क्रममा प्रचण्डले भाजपाका अध्यक्ष नाड्डासहित विदेशमन्त्री एस जयशंकर, राष्ट्रिय सुरक्षा सल्लाहकार अजित डोभललगायतसँग भेटवार्ता गरेका थिए । प्रचण्डले भारतीय प्रधानमन्त्री नरेन्द्र मोदीसँग पनि भेट गर्ने बताइएको थियो । तर, मोदीसँग भने भेट नभएको बताइएको छ ।