भौतिक पूर्वाधार तथा यातायातमन्त्री मोहम्मद इश्तियाक राईले इम्बोस्ड नम्बर प्लेटबारे एक–दुई दिनभित्रै सुखद् समाचार सुन्न पाइने बताएका छन् । मंगलवार काठमाडौं महानगरपालिकाका मेयर बालेन्द्र साहसँगको छलफलपछि पत्रकारहरूसँग कुरा गर्दै उनले इम्बोस्ड नम्बर प्लेटबारे नयाँ निर्णय गर्न लागिएको खुलासा गरेका हुन् । 

इम्बोस्ड नम्बर प्लेट नेपाली भाषामा लेखिनुपर्ने माग उठिरहेका बेला मन्त्री राईले इम्बोस्ड नम्बर नेपाली भाषामा लेख्न दिइने संकेत गरेका हुन् । ‘इम्बोस्ट नम्बर प्लेटको एक दुई दिनमा नै सुखद् समाचार सुन्न पाउनु हुनेछ,’ उनले भने, ‘त्यसको औचित्यतामा नेपालीहरूले गौरव गर्नसक्ने केही कुराहरु रिपोर्ट आएपछि कार्यान्वयन गर्ने कुरा जानकारी गराउँछौँ ।’

मन्त्री राईले स्मार्ट ड्राइभिङ लाइसेन्स सबै प्रदेशमा छपाइ गर्ने व्यवस्था गरिने बताएका छन् । उनले स्मार्ट ड्राइभिङ लाइसेन्स र इम्बोस्ट नम्बर प्लेटबारे अनुसन्धान गर्न बनेको समितिको प्रतिवेदन केही दिनमा नै आउने बताउँदै त्यसपछि स्मार्ट लाइसेन्स प्रदेशस्तरमै छपाइको व्यवस्था गरिने बताए । 

उनले समितिको प्रतिवेदन आएपछि स्मार्ट ड्राइभिङ लाइसेन्सको समस्या समाधानका लागि प्रदेशस्तरमै मेसिन राखेर लाइसेन्स छाप्ने व्यवस्था गर्ने बताए । उक्त व्यवस्थापछि लामो समयसम्म लाइसेन्स कुर्नुपर्ने अवस्थाको अन्त्य हुने मन्त्री राईको दाबी छ । उनले लाइसेन्सको परीक्षामा पास भएको दिन वा दोस्रो दिन नै स्मार्ट लाइसेन्स पाउने व्यवस्था गरिने बताए । 

मन्त्री राईले स्मार्ट ड्राइभिङ लाइसेन्स सक्कली वा नक्कली हो भनी परीक्षण गर्ने मेसिन प्रत्येक ट्राफिक प्रहरीको हातमा उपलब्ध गराइने बताएका छन् । उनले ट्राफिक जरिबाना अनलाइनबाटै तिर्न मिल्ने व्यवस्था कार्यान्वयनमा ल्याइने पनि बताए ।