नेकपा एकीकृत समाजवादी (एस)का सम्मानित नेता एवं पूर्वप्रधानमन्त्री झलनाथ खनालले अमेरिकी राज्य साझेदारी कार्यक्रम (एसपीपी) अस्वीकार गर्ने मन्त्रिपरिषद्को निर्णयबारे पत्राचार नभएकोमा आक्रोश व्यक्त गरेका छन् । 

बिहीवार बसेको प्रतिनिधिसभा बैठकको विशेष समयमा पूर्वप्रधानमन्त्री खनालले मन्त्रिपरिषद्को निर्णय कार्यान्वयनमा ढिलाई भएको भन्दै आपत्ति जनाएका हुन्  । 

‘मुलुकको राष्ट्रियताका सामू अनेकन खतरा मडारिएका छन् । हामीले एसपीपी लिन्नौँ भनेर सदनबाट भनेको र मन्त्रिपरिषद्ले निर्णय गरेको एक महिना भइसक्यो । चाँडोभन्दा चाँडो पत्र लेखेर रोक्छौँ भनेको हो’ खनालले भने, ‘अहिलेसम्म त्यो पत्र किन लेख्न सकिएन ? देशको क्याबिनेटभन्दा कतातिर छ कार्यकारी अधिकार ?’ 

खनालले कार्यकारी अधिकार भएको क्याबिनेटको निर्णय अदृश्य शक्तिले रोकेको भन्दै आपत्ति जनाए । ‘मन्त्रिपरिषद्ले निर्णय गरेपछि फेरि पनि किन रोक्ने निर्णय भयो ? प्रधानमन्त्रीको ध्यानाकर्षण गराउँछु, यो कुरालाई गम्भीरतापूर्वक लिइयोस् । चाँडोभन्दा चाँडो समाधान गरेर राष्ट्रको भावनालाई सम्बोधन गरियोस्’ खनालले भने ।

एसपीपी अस्वीकार गर्ने निर्णयबारे अमेरिकालाई पत्राचार गर्न ढिलाई गरिएकोमा माओवादी मुख्य सचेतक देव गुरुङले पनि संसदमा आपत्ति जनाएका थिए । यसै विषयमा एमाले सांसद भीम रावलले हिजो संसद्को रोष्ट्रम कब्जा गरेका थिए ।