संसदमा अलि फरक शैलीमा आफ्ना कुरा राख्ने जुम्लाका सांसद गजेन्द्र महतले आफूतिर नहेर्न प्रतिपक्षी दल नेकपा एमालेका सांसदलाई आग्रह गरेका छन् । मंगलवार बसेको प्रतिनिधि सभा बैठकको शून्य समयमा महतले जिल्लाको समस्या उठाउने भन्दै आज आफूतिर हेर्नु नपर्ने बताए । 

‘सभामुख महोदय प्रतिपक्षले म तिर हेरेको छ, उता होइन । म आज जुम्ला जिल्लाकै समस्या भन्दैछु । सुर्खेत जुम्ला सडक पिच गरेको .. पिच त भाग्यमै लेखेको छैन सभामुख महोदय । ओटाशील गरेको १० वर्ष भयो । यता नेताहरू भएको शहर बजारमा ६÷७ पटक पिच भइसक्यो । काठमाडौंको पिच त ५ इन्चभन्दा बाक्लो छ । मन्त्री भएको ठाउँमा ४ इन्चभन्दा कम छैन । हाम्रो बाटो हिलाम्य छ, स्याउ झार्ने बेला भयो, स्याउ बाटोमा कुहिन्छ । यो सरकारको ध्यान जाओस्’ महतले भने । 

विगतका बैठकहरूमा महतले प्रतिपक्षी दल एमालेप्रति कटाक्ष गर्ने गरेका थिए । यसअघि उनले बार्दलीमा उभिएर नेपाललाई श्रीलंका बनाइदिन्छु भन्ने प्रतिपक्षी दलका नेता र एम अधिकारीको नाममा एमालेको विभागमा बसेका गभर्नर महाप्रसाद अधिकारीप्रति कटाक्ष गरेका थिए । उक्त कटाक्षको चर्चा भएको थियो ।