परिवारकै सदस्यको योजनामा बाँकेको कोहलपुरका गडरिया दम्पतीको हत्या भएको खुलेको छ । बाँकेको कोहोलपुर नगरपालिका वडा नम्बर १४ पार्वतपुरका २५ वर्षीय कृष्ण गडरिया र उनकी २३ वर्षकी श्रीमती अञ्जलीको आफ्नै दाजु विजयको योजनामा हत्या भएको बाँके प्रहरीको अनुसन्धानले पत्ता लगाएको हो । कृष्ण र अञ्जली मंगलवार बिहान घरमै मृत अवस्थामा फेला परेका थिए । 

जिल्ला प्रहरी कार्यालय, बाँकेका प्रहरी प्रवक्ता मधुसुदन न्यौपानेले १ लाख बैना दिएर भाइ र बुहारीको हत्या गर्न मान्छे परिचालन गरेको विजयले प्रहरी समक्ष स्वीकार गरेको लोकान्तरलाई जानकारी दिए । भाडामा प्रयोग भएका अभियुक्तहरूको बारेमा भने प्रहरीले खुलाएको छैन । उनीहरू फरार रहेकाले तत्काल नखुलाइएको प्रहरीको भनाइ छ । 

केही महिना अगाडि भाइ कृष्ण र बुहारी अञ्जलीले उक्साएर बुबा घिरनले आफूलाई पिटेका कारण हत्याको योजना बनाएको विजयले प्रहरीलाई बताएका छन् । प्रहरीका अनुसार भाइ र बुहारीको उक्साहटमा परेर बुबाले आफूलाई कुटेको रिसइबी साँध्न आफूले भाइ र बुहारीको हत्याका लागि मान्छे परिचालन गरेको उनले बताएका छन् । 

१८ दिन अगाडि अञ्जलीलाई मार्न भनी सुपारी रकम दिएको उनले प्रहरीलाई बयान दिएका छन् । उनले साउन ९ गते राति बोलाई भाइ बुहारीलाई मार्ने योजना बनाएको प्रहरीलाई बयान दिएको प्रहरी प्रवक्ता न्यौपानले बताए । 

हत्या भएको बखत विजय र उनकी श्रीमती सोही घरको छतमा सुतिरहेका थिए । 

विजयले १ लाख रुपैयाँ बैना दिएर भाइ कृष्ण र बुहारी अन्जलीको हत्या गर्न लगाएको प्रहरीसमक्ष स्वीकार गरेको बाँकेका प्रहरी प्रवक्ता मधुसुदन न्यौपानेले जानकारी दिए । 

मृतक कृष्णले नजिकैको स्टील उद्योगमा काम गर्दै आएका थिए । अञ्जली गृहिणी थिइन् । उनीहरूको एक वर्ष अगाडि मात्र विवाह भएको थियो । पछिल्लो समय लुम्बिनी प्रदेशमा अपराधका घटना बढ्दै गएका छन् ।