नवलपरासी पूर्व (नवलपुर) को विनयी त्रिवेणी गाउँपालिका २ दाउन्नेमा यात्रुबाहक बस दुर्घटना भएको छ ।

बुधवार बिहान करीब ५ बजे दाउन्नेको ओरालो कटेपछि बस पल्टिएको जिल्ला प्रहरी कार्यालय नवलपुरका प्रवक्ता एवम् डीएसपी सन्तोष पाठकले लोकान्तरलाई जानकारी दिए । 

उनका अनुसार, कञ्चनपुरबाट काठमाडौंतर्फ आउँदै गरेको ना५ख ५१०० नम्बरको यात्रुबाहक बस अनियन्त्रित भइ पल्टिएको हो । 

दुर्घटनामा २१ जना सामान्य घाइते भएका छन् भने थप ४ जनाको अवस्था गम्भीर रहेको छ । 

डीएसपी पाठकले भने,'करीब ५ बजेतिर आएको बस अनियन्त्रित भएर पल्टिएको रहेछ, ४ जना गम्भीर घाइते छन् भने २१ जना सामान्य घाइते छन् ।'

उनका अनुसार बस पल्टिएपछि आगलागी समेत भएको छ । 

बसमा कति जना सवार रहेका थिए भन्ने बारे यकीन तथ्यांक आइनसकेको उनले जानकारी दिए । 

अहिले घाइतेहरूको स्थानीय अस्पतालमा उपचार भइरहेको प्रहरीले जनाएको छ ।