काठमाडाैं उपत्यका ट्राफिक प्रहरी कार्यालयले उपत्यकाका विभिन्न स्थानबाट हराएका २० थान मोटरसाइकल फेला पारी सम्बन्धित धनीलाई बुझाएको छ । प्रहरीले विभिन्न कम्पनीका १६ वटा मोटरसाइकल र ४ वटा स्कुटर बिहीवार सम्बन्धित धनीलाई बुझाएको हो । 

उपत्यकाका विभिन्न स्थानमा फेला परेका मोटरसाइकल र स्कुटर प्रहरी वरिष्ठ उपरीक्षक राजेन्द्रप्रसाद भट्टले सम्बन्धित धनीलाई बुझाएका हुन् । ट्राफिक प्रहरी टोलीले खोजतलास गर्ने क्रममा ती मोटरसाइकलहरू फेला पारेको उनले बताए । मोटरसाइकल चोरीका घटना न्यूनीकरण गर्न ट्राफिक प्रहरी पीडित सहायता इकाइबाट सादा पोशाकमा थप ट्राफिक प्रहरीसमेत परिचालन गरेको छ ।