एनआईसी एशिया बैंकका ग्राहकले अब नगद रकम मेशिनमार्फत सोझै आफ्नो खातामा जम्मा गर्न सक्ने भएका छन् । बैंकले नगद रकम जम्मा गर्न सकिने मेशिन जडान गरेको छ । उक्त सेवाको हालै आरम्भ गरेको बैंकले जनाएको छ । 

उक्त सेवा प्रारम्भ भएपछि सेवाग्राहीले अब आफ्नो खातामा रकम जम्मा गर्नका लागि बैंकको काउण्टरमा लामो समयसम्म लाइन बस्न नपर्ने भएको छ । बैंकको काउण्टरमा लाइन बसेर नगद जम्मा गर्नुपर्ने बाध्यताबाट ग्राहकहरूलाई छुटकारा मिलेको बैंकले जनाएको छ । 

‘डिजिटल फस्ट बैंक’ बन्ने दीर्घकालीन रणनीति अनुरूप यो सेवा आरम्भ गरिएको बैंकका सूचना अधिकारी अर्जुनराज खनियाँले जानकारी दिए । उनका अनुसार यो रणनीतिअन्तर्गत सम्पूर्ण बैंकिङ सेवा तथा सुविधाहरू क्रमिक रूपले डिजिटल माध्यमबाट प्रदान गरिने छ । 

यस मेशिनबाट १ हजार र ५ सय रुपैयाँ दरका नोटहरू मात्र जम्मा गर्न मिल्ने व्यवस्था रहेको बैंकले जनाएको छ । सूचना अधिकारी खनियाँका अनुसार एक जना ग्राहकको खातामा एक पटकमा अधिकतम ९९ हजार ५०० सय र दैनिक अधिकतम् ९ लाख ९९ हजार ५ सयसम्म नगद जम्मा गर्न सकिने छ । 

मेशिनबाट नगद जम्मा गर्दा खाता नम्बर राखेपछि खातावालको मोबाइल नम्बरमा ओटीपी प्राप्त हुने र उक्त ओटीपी मेशिनमा उल्लेख गरेर भेरिफाई भएपछि रकम जम्मा हुने बैंकले जनाएको छ । उक्त मेशिनमा आफूले जम्मा गर्न चाहेको नगद रकम राखेपछि मेसिनले सो रकम गनेर खातामा तत्काल जम्मा गरिदिने खनियाँले बताए । त्यसको जानकारी एसएमएस तथा रिसिप्ट मार्फत उपलब्ध हुने व्यवस्था बैंकले गरेको छ । 

बैंकले यो सेवा न्यूरोड बिशालबजार शाखाबाट शुरू गरिएको जनाएको छ । यो सेवालाई निकट भविष्यमा देशका अन्य शाखाहरूमा समेत विस्तार गर्ने योेजना रहेको उनले बताए । 

एनआईसी एशियाले मुलुकभर ३५९ शाखा कार्यालयहरू, ४७३ एटिएम, १०२ वटा विस्तारित काउन्टर एवं ८१ वटा शाखा रहित बैंकिङ मार्फत बैंकिङ सेवा प्रदान गरिरहेको छ । एनआईसीले देशको कुल जनसंख्यामध्ये आर्थिक रूपमा सक्रिय करिब २५ प्रतिशत जनतालाई सेवा दिइरहेको दाबी गरेको छ । 

बैंकले प्रत्यक्ष र अप्रत्यक्ष गरी कुल रू. १९ अर्ब ९२ करोडभन्दा बढी राजस्व सरकारलाई भुक्तानी गरेको बताएको छ । बैंकले गत आर्थिक वर्षमा मात्र करिब रू.३ अर्ब ४१ करोडभन्दा बढी राजस्व सरकारलाई बुझाएर वाणिज्य बैंकहरूमध्ये सबैभन्दा बढी कर दाखिला गर्ने बैंकको रूपमा स्थापित भएको बताएको छ ।