पोखराको प्रतिष्ठित फूटबल प्रतियोगिता आहा रारा गोल्डकपको २०औं संस्करणमा आयोजकलाई ३ लाख ४७ हजार ८०० रुपैयाँ घाटा लागेको छ ।

प्रतियोगिताको आयोजक सहारा क्लब पोखराले शनिवार पत्रकार सम्मेलन आयोजना गरी आयव्यय सार्वजनिक गरेको हो ।

प्रतियोगितामा विभिन्न प्रायोजन तथा संघसंस्थाबाट कूल आम्दानी ६६ लाख ४१ हजार १८१ रुपैयाँ भएकामा खर्च ६९ लाख ८९ हजार रुपैयाँ भएको क्लबले जनाएको छ । 

कोभिड–१९ संक्रमणका कारण सेमिफाइनल र फाइनल खेलमा बाहेक विना दर्शक खेलाइएको प्रतियोगितामा १२ लाख ६२ हजार ८२६ नोक्सान भए पनि विषम परिस्थितिलाई मध्यनजर गरी सहारा हङकङबाट ५ लाख १ हजार, सहारा यूकेबाट ३ लाख र सहारा अस्ट्रेलियाबाट १ लाख रुपैयाँ थप सहयोग प्राप्त भएकाले नोक्सान कम भएको अर्थ संकलन उपसमिति संयोजक सुनिल गुरुङले बताए ।

प्रतियोगितालाई मुख्य प्रायोजक हिमश्री फुड्सबाट १३ लाख ५१ हजार, गण्डकी प्रदेश खेलकुद परिषद्बाट ५ लाख, राष्ट्रिय खेलकुद परिषद्बाट ४ लाख ९२ हजारसहित विभिन्न संघसंस्थाबाट सहयोग प्राप्त भएको थियो ।

खेलाडी दैनिक भ्रमण खर्चमा २७ लाख ४८ हजार १५०, टीम प्रोत्साहन खर्च १७ लाख ९३ हजार ९५०, रेफ्री खर्च ४ लाख २६ हजार ८८५, प्रचारप्रसार, आयोजक टीम तयारी लगायत शीर्षकमा खर्च भएको क्लबले जनाएको छ ।

गत माघ ६ देखि १५ गतेसम्म २०औं संस्करणको प्रतियोगिता सञ्चालन भएको थियो । 

प्रतियोगिताको उपाधि सशस्त्र प्रहरीको नेपाल एपीएफ फूटबल क्लबले जित्दा मनाङ मस्र्याङ्दी फूटबल क्लब उपविजेता बनेको थियो । सहाराले फूटबल प्रतियोगिता आयोजनाबाट संकलित रकमबाट सहारा फूटबल एकेडेमी सञ्चालन गर्दै आएको छ ।