पोखरामा भारी वर्षा हुँदा कमलपोखरी क्षेत्र डुबानमा परेको छ ।  

आइतवार साँझदेखि शुरू भएको वर्षा अहिलेसम्म नरोकिँदा सो क्षेत्र डुबानमा परेको हो  । 

भारी वर्षाका कारण कमलपोखरी क्षेत्रका सयभन्दा बढी घरहरू डुबानमा परेका छन् । 

पोखरा महानगरपालिकाको वडा नम्बर १३ कमलपोखरी क्षेत्रमा भारी वर्षा हुँदा सयभन्दा बढी घरहरू डुबानमा परेको वडाध्यक्ष किरण बरालले लोकान्तरलाई जानकारी दिए । 

उनका अनुसार, आइतवार साँझदेखि नै सो क्षेत्रमा भारी वर्षा भएको हो ।

वडाध्यक्ष बरालले भने,‘म अहिले पनि डुबान क्षेत्रमै छु, वर्षा रोकिएको छैन, डुबानकै अवस्था छ ।’

उनले अहिले वडाबासीलाई घरभित्रै सुरक्षित रहन भनिएको बताए । 

‘वर्षा रोकिए काम गर्न सहज हुन्थ्यो, अहिले त केही गर्ने अवस्थै रहेको छैन,’ उनले भने,‘नागरिकलाई घरभित्रै बस्नु भनेका छौँ ।’ 

जल तथा मौसम विज्ञान विभागले सो क्षेत्रमा  थप वर्षा हुन सक्ने भन्दै सुरक्षा सतर्कता अपनाउन आग्रह गरेको छ । 

गण्डकी प्रदेशका कास्की, बाग्लुङ, तनहुँ, गोरखा र आसपास केही स्थानमा भारी वर्षा मापन भएको  विभागले जनाएको छ ।