चलचित्र ‘प्रेमगीत ३’ नेपाल र भारतमा एकैदिन रिलिज हुने भएको छ । प्रदीप खड्का र क्रिस्टिना गुरुङको शीर्ष भूमिका रहेको चलचित्र असोज ७ गते नेपाल र भारतमा एकसाथ प्रदर्शनमा आउने भएको हो । निर्माण टिमले सोमबार भारतीय संस्करणको पोस्टर सार्वजनिक गर्दै एउटै मितिमा चलचित्र प्रदर्शन हुने जानकारी दिएको छ । 

यसअघि भारतमा ‘विश्वजितम’ शीर्षकमा चलचित्रलाई रिलिज गर्ने बताइए पनि शीर्षक ‘प्रेमगीत ३’ नै रहने भएको छ । पहिलेकै शीर्षक राख्दा व्यवसायिक रूपमा पनि फाइदा हुने देखेपछि निर्माण टिमले उक्त निर्णय गरेको बताएको छ । जी–म्यूजिक, यूएफओ र मधु इन्टरटेइनमेन्टले चलचित्रलाई भारतभर रिलिज गर्न लागेको हो । हल रिलिजको दुई महिनापछि ‘प्रेमगीत ३’ ओटीटी प्लेटफर्म अमेजनमा रिलिज हुने निर्माण टिमले जानकारी दिएको छ । निर्माताले महँगो मूल्यमा ‘प्रेमगीत ३’लाई भारत प्रदर्शनका लागि बेचेका हुन् । 

मधु इन्टटेनमेन्ट र यूएफओले चलचित्रलाई नेपालबाहेक विश्वभर रिलिजसमेत गर्ने छ । सेप्टेम्बर १ मा हिन्दी संस्करणको ट्रेलर सार्वजनिक हुँदैछ । सन्तोष सेन र छेतन गुरुङको निर्देशन रहेको चलचित्रमा प्रदीप र क्रिस्टिनाका साथमा शिव श्रेष्ठ, सुनिल थापा, माओत्से गुरुङ, मनिष राउत, पुस्कर कार्की, प्रेम पुरी, अनुभव रेग्मी, सन्तोष सेनलगायतको अभिनय छ । सन्तोष सेनको निर्माण रहेको चलचित्रको लेखन तथा निर्देशन छेतन र मन्दिप गौतम मिलेर गरेका हुन् ।