मध्यपुरथिमि नगरपालिकाको कार्यालय नजिकै पाटी बिहार अगाडि दुई सातादेखि फोहर थुप्रिएको छ । धेरै वर्ष फोहर फाल्ने ठाउँको रूपमा रहेको सो क्षेत्रमा केही महिना अगाडि मात्रै सफाई गरेर नगरपालिकाले निषेधित क्षेत्रको ब्यानर टाँगेर फोहर फाल्न मनाही गरेको थियो । 

नगरपालिकाको त्यो व्यवस्था एक महिना पनि टिकेन । स्थानीयले साँझ बिहान बोरा र झोलामा ल्याएका फोहर त्यहीँ फाल्न थालेपछि नगरपालिका कार्यालयको नाकै अगाडि फोहर थुप्रिएको छ । सम्पदा क्षेत्रको रूपमा रहेको पाटी विहारमा तीन सातादेखि फोहरको डंगुर लाग्दा त्यस क्षेत्रमा अहिले दुर्गन्ध फैलिएको छ । 

एकातिर वर्षामा अविरल परेको पानीले दिनानुदिन कुहिएर गन्हाउन थालेको र अर्कोतर्फ भुस्याहा कुकुरले फोहरका बोरा र प्लाष्टिक च्यातेर सडकमा छरपष्ट गर्दा पैदल हिँड्नेले समेत सास्ती भोग्नुपरेको छ । ‘दुर्गन्धले बस्नै नसकिने भएको छ’, स्थानीय श्यामलाल बस्यालले भने । स्थानीयले दैलो अगाडि जथाभावी फोहर फाल्नु, नगरपालिकाले फोहरको डंगुरको व्यवस्थापन नगर्नु र ठेक्कामा प्रतिघर मासिक रु तीन सय ५० मा फोहर संकलन गर्दै आएको निजी क्षेत्र नेप्से म्याकले जिम्मेवारी बहन नगर्दा जनताले सास्ती खेप्नुपरेको छ । 

उनी भन्छन्, ‘जथाभावी फोहर फाल्ने यहाँका जनता पहिलो दोषी हुन्, नगरपालिकाभित्रको फोहर व्यवस्थापन गर्न नसक्ने र निजी क्षेत्रलाई फोहर संकलनलाई दबाब दिन नसक्ने नगरपालिका अर्को दोषी हो, फोहर संकलन गर्ने जिम्मा लिएर उपभोक्तासँग मासिक रकम असुल्ने नेप्से म्याक पनि दोषी हो, यहीँ फोहरका कारण महामारी फैलिए त्यसको जिम्मेवारी कसले लिने ?’

मध्यपुरथिमि नगरपालिका–५ संगम कोलोनी क्षेत्रका बासिन्दा उत्तिकै पीडित छन् । यस क्षेत्रको फोहर उठाउने जिम्मेवारी लिएको नेप्से म्याकले विगत दुई महिनादेखि नियमित रूपमा फोहर संकलन गरेको छैन । सातामा दुई दिन फोहर संकलन गर्दै आए पनि दुई महिनायता सातादेखि १० दिनमा आउने गरेको थियो । तर, अहिले तीनसातादेखि फोहर संकलन गर्न नआउँदा फोहर स्थानीयले जथाभावी फाल्न थालेका हुन् । 

पछिल्लो समय कुहिने र नकुहिने फोहर छुट्याएर राखे पनि फोहर संकलन नै गर्न नआए पछि घरघरमै फोहर कुहिएर किरा परेर दुर्गन्ध फैलिन थालेको स्थानीय बताउँछन् । संगम कोलोनीका विष्णुप्रसाद पराजुलीले नेप्से म्याकले लापरबाही गरेको बताए । हरेक महिना पैसा लैजाने तर फोहर नलग्ने कार्य गलत भएको उनको भनाइ छ । कम्तीमा कुहिने फोहर संकलन गरेर मल उत्पादन गर्ने वा डम्पिङ गर्ने व्यवस्था गर्नुपर्नेमा उपत्यकामा फोहर उठेको छैन भन्दै नेप्से म्याक जिम्मेवारीबाट पन्छिने गरेको पराजुलीको गुनासो छ । 

कोठा कोठामा फोहर, घरघरमा फोहर, चोक चोकमा फोहर थुप्रिँदा गर्मी र वर्षा मौसमले रोगको महामारी फैलिन सक्ने मध्यपुरथिमिका चिकित्सक डा रामदास श्रेष्ठले बताए । फोहरको उचित व्यवस्थापन चाँडै नगरे यसबाट मानवीय स्वास्थ्यमा प्रतिकूल समस्या आउन सक्ने भन्दै उनले सम्बन्धित निकायको ध्यान जानुपर्ने बताए । रासस