सत्तारुढ गठबन्धनले मंसिर ४ गते हुने प्रतिनिधि सभा र प्रदेश सभा निर्वाचनमा तालमेल गर्ने औपचारिक निर्णय गरेको छ । प्रधानमन्त्री निवास बालुवाटारमा शुक्रवार बसेको गठबन्धनमा आवद्ध दलहरूको बैठकले चुनावी तालमेल गर्ने औपचारिक निर्णय गरेको सञ्चारमन्त्रीसमेत रहेका नेपाली कांग्रेस नेता ज्ञानेन्द्रबहादुर कार्कीले जानकारी दिए ।

चुनावी तालमेलका लागि सीट बाँडफाँटका लागि कार्यदल बनाउने निर्णय भएको छ । कांग्रेस वरिष्ठ नेता रामचन्द्र पौडेलको संयोजकत्वमा कार्यदल बनाउने  सहमति भएको अर्का एक नेताले जानकारी दिए ।  कार्यदलमा सबै दलबाट दुई/दुई जना सदस्य रहने बताइएको छ ।

उनीहरूको सुझावका आधारमा शीर्ष नेताहरूले भदौ मध्यसम्म सीटको टुंगो लगाउने ती नेताले बताए । मन्त्री कार्कीले कार्यदल बनाउने सहमति भएको बताए पनि थप खुलाएनन् । 

‘आगामी मंसिर ४ गते हुने प्रतिनिधि सभा र प्रदेश सभा निर्वाचनमा सत्ता-साझेदार दलहरूबीच चुनावी तालमेल गरी अगाडि बढ्ने निर्णय भयो’ कार्कीले भने, ‘तालमेलका लागि फेरि बैठक बस्छ । व्यवस्थित र न्यायपूर्ण तालमेल गर्ने सहमति भएको छ ।’ 

तालमेल गर्ने औपचारिक निर्णयमा प्रधानमन्त्री एवं कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधव नेपाल, जनता समाजवादी पार्टीका अध्यक्ष उपेन्द्र यादव र राष्ट्रिय जनमोर्चाकी उपाध्यक्ष दुर्गा पौडेलले हस्ताक्षर गरेका छन् । 

स्रोतका अनुसार बालुवाटार बैठकमा गठबन्धनमा रहेका बाहेक अन्य दलसँग तालमेल नगर्ने ‘भद्र सहमति’ भएको छ । सरकारले बिहीवार मंसिर ४ गतेका लागि चुनावको मिति घोषणा गरेको थियो ।