श्रम, रोजगार तथा सामाजिक सुरक्षामन्त्री शेरबहादुर कुँवरले मन्त्रालयको कल सेन्टरमा बसेर गुनासो सुन्न थालेका छन् । आइतवार उनले ६ जना श्रमिकहरूको गुनासो सुनेका छन् । 

मन्त्री कुँवरले अबदेखि प्रत्येक आइतवार प्रत्यक्ष रूपमा श्रमिकहरूको गुनासो सुन्ने कार्यको शुरुआत गरेको जानकारी दिए । अबदेखि प्रत्येक आइतवार बिहान १० बजेदेखि १२ बजेसम्म कल सेन्टरमा बसेर गुनासो सुन्ने उनले बताए । 

आइतवार श्रममन्त्री कुँवरसँग विदेशबाट श्रमिकको शव ल्याउन नसकेको, मलेसिया तथा अन्य देशमा जान म्यानपावरहरूले लाखौं रकम लिएको लगायतका गुनासो राखेका थिए । मन्त्री कुँवरले श्रमिकको गुनासो सुन्दै विदेश जाने श्रमिकलाई ठगी गर्नेलाई पीडितले प्रमाणसहित ल्याए तत्काल कानूनअनुसार कारबाही गर्ने बताए । उनले १० वर्ष अगाडि ठगी गर्नेसमेत पक्राउ गर्ने काम भएको भन्दै ठगी गर्ने क्षणिक समयको लागि राम्रो भएपनि अन्त्यमा कानूनको कठघरामा ल्याउने आश्वासन दिए । 

मन्त्री कुँवरले श्रम स्वीकृत नगरी विदेश पुगेका, विदेशमा नै मृत्यु भएकालाई नेपाल ल्याउन केही कानूनी जटिलताहरू रहेको बताए । उनले त्यो जटिलता समाधान गर्नको लागि मन्त्रालय कानून निर्माणमा पनि लागेको बताए । मन्त्री कुँवरले श्रमिकहरूलाई सबै कुरा नबुझी विदेश नजान सल्लाह दिएका छन् । 

त्यस्तै, मन्त्रालयका सचिव एकनारायण अर्यालले मन्त्रालयको कल सेन्टरमा दैनिक स्वदेश तथा विदेशबाट २ सयसम्म उजुरी आउने गरेको बताए । उनले मन्त्रालयले उजुरी छनोट गरेर प्रहरी र विभिन्न विभागमा सम्बोधनको लागि पठाउने गरेको जानकारी दिए । उनले कल सेन्टरमा आएका उजुरीको आधारमा पछिल्लो चार महिनामा ३० करोड रुपैयाँ पीडितहरूको असुल गरिएको पनि दाबी गरे ।