प्रमुख प्रतिपक्षी दल नेकपा एमालेले आसन्न प्रतिनिधि सभा र प्रदेश सभाको निर्वाचन आचारसंहितामा समेट्न १३ बुँदे सुझाव दिएको छ । एमालेले सोमवार निर्वाचन आयोगका पदाधिकारीसँगको छलफलमा लिखित सुझाव दिएको हो । 

आयोगले प्रस्ताव गरेको निर्वाचन आचारसंहितामा ३७ बुँदामा दफावार संशोधनका लागि सुुझाव प्रस्तुत गरेको प्रचार विभाग सचिव गगन विष्टले जानकारी दिए । एमालेले निर्वाचन आचारसंहिताले निर्वाचनको स्वच्छता, निष्पक्षता, पारदर्शिता, तटस्थताजस्ता पक्षमा ध्यान दिई निर्वाचन आचारसंहितालाई लागू गर्न सकिने बनाउनुपर्ने, निर्वाचन आचारसंहिता लागू हुने अवधि निर्वाचन घोषणादेखि मतदान सम्पन्न नभएसम्म गर्नुपर्ने सुझाव दिएको छ । 

त्यस्तै, एमालेका सुझावमा निर्वाचनको मौन अवधि ४८ घण्टा घटाई २४ घण्टा बनाउनुपर्ने, उम्मेदवारको मनोनयनपत्र पेश गर्न जाँदा वा प्रचार प्रसारको लागि पच्चीस जनाभन्दा बढीको जुलुस लान नपाइनेलगायतको व्यवस्था हुने भएकाले सो व्यवस्था हटाउनुपर्ने उल्लेख छ ।