लोकतान्त्रिक समाजवादी पार्टी (लोसपा)का शीर्षहरूले राष्ट्रपति विद्यादेवी भण्डारीलाई भेटेर नागरिकता विधेयक प्रमाणीकरण गरिदिन आग्रह गरेका छन् । 

शनिवार उक्त पार्टीका अध्यक्ष महन्थ ठाकुरसहित शरदसिंह भण्डारी, अनिल झा, लक्ष्मणलाल कर्ण, जितेन्द्र सोनल, उमाशंकर अरगरिया, सर्वेन्द्रनाथ शुक्ललागयतका नेताहरू राष्ट्रपतिलाई भेट्न शीतल निवास गएका थिए ।  

‘राष्ट्रपति भनेको राष्ट्रकै अभिभावक हो । नागरिकता विहीनहरूको समस्या बुझेर नागरिकता विधेयक प्रमाणीकरण गरिदिनुहोस् भनेर आग्रह ग¥यौँ’, लोसपाका नेता जितेन्द्र सोनलले लोकान्तरसँग भने । 

राष्ट्रपतिले जातीय, क्षेत्रीय आधारमा हेर्नु नहुने र नागरिकता विहीनहरूको समस्या बुझ्नुपर्ने विषयमा लोसपाका नेताहरूले ध्यानाकर्षण गराएको सोनलले बताए । 

राष्ट्रपति भण्डारीले भने नागरिकता समस्या स्थायीरूपमा नै समाधान होस् भन्ने आफ्नो चाहना रहेको बताएको सोनलले जानकारी दिए ।

राष्ट्रपति भण्डारीले १५ बुँदे सुझावसहित फिर्ता गरेको नागरिकता विधेयक प्रतिनिधि सभाले जस्ताको तस्तै पारित गरेको छ । उक्त विधेयक राष्ट्रिय सभामा पेश हुने क्रममा छ । नागरिकता विधेयक जस्ताको तस्तै प्रमाणीकरणका लागि आए ‘पदभन्दा देश ठूलो हुने’ भन्दै राष्ट्रपतिले राजीनामा दिने तयारी गरेको चर्चा भइरहेको छ ।