नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले पर्सी (बुधवार)सम्ममा गठबन्धनमा रहेका दलहरूबीच सिट बाँडफाँटबारे टुंगो लाग्ने बताएका छन् । उनले पर्सीसम्ममा आगामी मंसिर ४ गते हुने प्रतिनिधि सभा र प्रदेश सभाको निर्वाचनको सिट बाँडफाँटबारे टुंगो लाग्ने सहमति भइसकेको जानकारी दिएका हुन् । 

सोमवार काठमाडौंमा आयोजित माओवादी केन्द्रको उपत्यका विशेष प्रदेश समितिको वैचारिक, राजनीतिक प्रशिक्षण तथा निर्वाचनसम्बन्धी कार्यक्रमलाई सम्बोधन गर्दै उनले तीन चरणमा सिटको भागबण्डा हुने बताए । भदौ १५ गतेसम्म सिट बाँडफाँट सक्ने र २० गते कुन क्षेत्रमा कुन दललाई उठाउने भन्ने निस्कर्ष निकाल्ने तथा २५ भदौसम्म आ–आफ्नो पार्टीले उठाउने उम्मेदवारको टुंगो लगाइसक्ने प्रचण्डले बताए । 

‘आज मात्र प्रधानमन्त्री र कांग्रेसका नेताहरूसँग पनि मेरो कुरा भएको छ । हाम्रो पर्सीसम्म संख्या टुंग्याउने प्रतिवद्धता छ । टुंग्याउने नजिक–नजिक पुगेका छौँ । यही गठबन्धनमा संख्या टुंग्याउँछौँ । पहिलो स्टेप । दोस्रो स्टेप हाम्रो टार्गेट भनेको २० गतेसम्म कुन क्षेत्रमा माओवादीलाई, कुन कांग्रेसलाई, कुन समाजवादी, कुन जसपा, कुन जनमोर्चालाई हामी क्षेत्र र प्रदेशको कुन क्षेत्र र कुन प्रदेश कुन पार्टीले पाउने भन्ने कुराको टुंगो लगाउनेछाँै । हामीले २५ गतेसम्म हामी आफ्नो पार्टीले खडा गर्ने उम्मेदवार टुंग्याउँछौँ’, उनले भने ।