ऐलानी जग्गा देखाएर नम्बरी भनेर ठगी गरेको आरोपमा प्रहरीले एकजनालाई नियन्त्रणमा लिएको छ । बेलबारी ३ कि बसुन्धरा खतिवडालाई नम्बरी भन्दै ऐलानी जग्गा देखाएर ठगी गरेको अरोपमा बेलबारी नगरपालिका–३ खोरिया टोलका ५७ वर्षीय चित्रबहादुर बस्नेत पक्राउ परेका हुन् । 

बस्नेतले ३ वर्षअघि बैनाबापत पैसा लिएर ठगी गरेका मोरङ प्रहरी प्रवक्ता डिएसपी दीपक श्रेष्ठले जानकारी दिए । लिखित कागज गरेर नै बस्नेतले २०७६ साल पुस ३ गते खतिवडासँग ११ लाख ५० हजार रूपैयाँ लिएको खुलेको छ । बिक्री गर्ने भनी ३ कट्ठा ९ धुर ऐलानीलाई नम्बरी जग्गा हो भनेर झुक्याउँदै पैसा लिएको खुलेपछि नियन्त्रणमा लिएको मोरङ प्रहरीले जनाएको छ । 

पैसा लिएको लामो समयसम्म जग्गा पास नगरिदिएको र पछि ऐलानी रहेको थाहा पाएको भन्दै खतिवडाले गत साउन २३ गते इलाका प्रहरी कार्यालय बेलबारीमा किटानी जाहेरी दिएकी थिइन् । बस्नेतले २०७९ असार मसान्तभित्र जग्गा पास गर्ने भाका राखेका थिए । जग्गा पास नगरेपछि खतिवडाले जग्गाबारे सोधखोज गरेकी थिइन् । 

सोधीखोजी गर्ने क्रममा नम्बरी भनिएको जग्गा ऐलानी रहेको थाहा पाएपछि खतिवडाले बस्नेतविरुद्ध उजुरी दिएकी थिइन् । बस्नेतविरुद्ध ठगी मुद्दा चलाउन सोमवार जिल्ला अदालत मोरङबाट म्याद थप गरेर अनुसन्धान अगाडि बढाइएको बेलबारी प्रहरीले जनाएको छ ।