एउटा मात्र निर्वाचन क्षेत्र रहेको अर्घाखाँचीबाट आगामी प्रतिनिधिसभा निर्वाचनका लागि नेपाली कांग्रेसबाट उपसभामुख पुष्पा भुसालसहित ६ जनाको नाम सिफारिस गरिएको छ । क्षेत्रीय समिति बैठकले उपसभामुख भुसालसहित कांग्रेस लुम्बिनी प्रदेश सहमहामन्त्री विष्णुप्रसाद खनाल, पूर्वकेन्द्रीय सदस्य रेवतीप्रसाद भुसाल, महाधिवेशन प्रतिनिधिहरू रामबहादुर बिसी, लेखनाथ पोखरेल र मुक्तिराम श्रेष्ठको नाम सिफारिस गरेको क्षेत्रीय सचिव सुरज रायमाझीले जानकारी दिए । 

अर्घाखाँचीबाट २०७४ सालको निर्वाचनमा कांग्रेसकी बिसी उम्मेदवार थिए । तर, उनी तत्कालीन माओवादीका नेता (हाल एमाले सचिव) टोपबहादुर रायमाझीसँग पराजित भएका थिए । अर्घाखाँचीबाट रायमाझी लगातार निर्वाचित हुँदै आएका छन् । २०६४ र ०७० मा दुई पटक माओवादीबाट र २०७४ मा उनी वाम गठबन्धनबाट निर्वाचित भएका थिए ।