काठमाडौं महानगरपालिकाकी उपमेयर सुनिता डंगोलले पदभार ग्रहण गरेको १०० दिनमा गरेका काम र थालेका योजनाको श्वेतपत्र सार्वजनिक गरेकी छन् । 

डंगोलले सार्वजनिक गरेको श्वेतपत्रमा १०० दिनमा गरेका १५ काम र शुरूआत गरेका १० योजनाबारे उल्लेख गरिएको छ । २४४ वटा पुराना विवादमा न्यायिक सुनुवाइ भएकोे र  ५१ वटा विवाद किनारा लगाएको उनले सार्वजनिक गरेको श्वेतपत्रमा उल्लेख छ ।  

वडास्तरीय महिला सेल गठन, आर्थिक वर्ष ०७९/८० का लागि नीति तथा कार्यक्रमको प्रस्ताव तयार भएको उनले बताएकी छन् । 

यसअवधिमा फोहोर व्यवस्थापनका लागि सकारात्मक पहल शुरू भएको डंगोलले बताएकी छन् । ‘महानगर प्रमुखसहित मेरो प्रत्यक्ष उपस्थितिमा नुवाकोट जिल्लाको सिसडोल र नुवाकोटकै बञ्चरेडाँडा, टेकुस्थित ‘ट्रान्सफर स्टेसन’ लगायतका क्षेत्रको अनुगमन गर्ने र त्यहाँको वस्तुस्थिति बुझ्ने लगायतका काम भएका छन्,’ उनले भनेकी छन्, ‘पटक–पटकको प्रयासपछि  सिसडोल र बञ्चरेडाँडामा अल्पकालीन फोहोर व्यवस्थापन गर्ने कार्य भएको छ ।’ 

दीर्घकालीन फोहोर व्यवस्थापनका लागि छिमेकी नगर ठिमी लगायतका नगरपालिकाले गरेका योजनाको अवलोकन गर्ने र उनीहरूका अनुभवलाई समेत ग्रहण गर्दै दीर्घकालीन फाहोर व्यवस्थापनका लागि आवश्यक काम गर्ने उनले बताइन् । 

‘यहाँको विकास र समृद्धिमा राजनीतिक लेप लगाएर एकअर्काप्रति दोषारोपण गर्ने कुरा किमार्थ उचित होइन र हुँदैन पनि । त्यसैले यहाँको विकास र समृद्धिमा सबैको हातेमालो आवश्यक हुन्छ,’ डंगोलले भनेकी छन्, ‘हामीले १०० दिनमा के गर्‍यौं भनेर फेहरिस्त सार्वजनिक गर्नुभन्दा पनि हामीले जिम्मेवारी सम्हालेपछि काठमाडौं महानगरवासीले के–कति फरक अनुभूति गरे त्यो महत्वपूर्ण हो ।’ 

आफूले समावेशी लोकतन्त्रमा विश्वास गर्ने भएकाले आत्मगतभन्दा पनि सहकार्य, सहमति र सहअस्तित्वको भावनलाई आत्मबोध गर्दै अघि बढ्नुपर्छ भन्ने ठानेर काम गरिरहेको उनले बताइन् । 

‘सय दिनको अवधिमा ‘बिहानीले दिनको संकेत गर्छ’ भनेझैं केही सकारात्मक कामको थालनी गरी काठमाडौं महानगरवासीमा आशाको बत्ती बाल्ने प्रयास भने गरेका छौं । केही सकारात्मक योजनालाई हामीले अघि बढाएका छौं ।  यो म एक्लैबाट सम्भव भएको भने अवश्य होइन,’ उनले भनेकी छन् ।  

मेलमिलापकर्ता छनोट प्रक्रिया, मानव बेचबिखन ओसारपसार नियन्त्रणको प्रयास, शिक्षा क्षेत्रमा गरेका सुधारका प्रयास, इन्द्रजात्रालाई राष्ट्रिय तथा अन्तर्राष्ट्रियकरण गर्न गरेका पहल, नेपाल भाषाको डिजिटल शव्दकोष निर्माण कार्य, सम्पदा संरक्षण, पुनर्निर्माण र अनुगमन कार्यलाई प्राथमिकता जस्ता कुरालाई पनि १०० दिनमा गरेका कामको विवरणमा उनले उल्लेख गरेकी छन् । 

राजस्व परामर्श समितिको गठन र कार्यान्वयन, पारस्परिक र कूटनीतिक सम्बन्ध विस्तार, शहरी व्यवस्थापनमा गरेका प्रयासलाई पनि डंगोलको श्वेतपत्रमा उल्लेख छ । 

‘काठमाडौं महानगरपालिका सामाजिक सेवा विभाग अन्तर्गत मेरो नेतृत्वमा अपाङ्गता भएका नागरिकको परिचयपत्र वितरण गर्ने कार्य भएको छ । जसमध्ये केही आवश्यक परेका व्यक्तिहरूको म स्वयं घरघरमै गएर परिचयपत्र वितरण गरिएको छ,’ डंगोलले भनेकी छन् ।  

शारीरिक अपाङ्गता भएका, सुस्त श्रवण, बौद्धिक अपाङ्गता भएका, दृष्टिविहिन, बहिरा, अटिज्म लगायतका ५७२ नागरिकलाई अहिलेसम्म परिचयपत्र वितरण गरिएको उनले बताइन् । 

यस अवधिमा थालनी गरिएका योजनामा करको दायरा वृद्धि गरी वैज्ञानिक कर निर्धारण विधिलाई आत्मसाथ गर्न राजस्व परामर्श समितिबाट नगरसभाको निर्णय बमोजिम सहजीकरण भइरहेको, सबै मेलमिलाप केन्द्रको स्तरीकरण गरी वडा तहमै विवाद समाधान गर्नका लागि प्रयासहरू थालनी गरिएको, सूचना प्रविधिको माध्यमबाट न्याय सम्पादनलाई छिटो, छरितो र प्रभावकारी बनाउनेतर्फ कारवाही अघि बढेको कुरा लगायतलाई आगामी योजनामा समावेश गरिएको छ ।