नेकपा एमालेका उपाध्यक्ष तथा पूर्वअर्थमन्त्री विष्णु पौडेलले रूपन्देही विकासको पाठशाला भएको बताएका छन् । विकास सिक्नको लागि रूपन्देही आउन उनले आग्रहसमेत गरे । विकास सिक्न, बुझ्न, र चिन्हका लागि रूपन्देही उपयुक्त पाठशाला भएको उनको दाबी छ । 

बुटवलको कालिका मानव–ज्ञान माविमा शुक्रवार आयोजित कानून विद्यार्थी समाजको कार्यक्रममा बौल्दै पौडेलले अरूले कल्पना नगरेको विकासको शुरुआत रुपन्देहीबाट भएको दाबी गरे । ‘अरुले कल्पना नगरेका विकास निर्माणका काम हामीले अघि बढाएका छौँ । भौतिक पूर्वाधारको विकासले मात्र होइन मानवीय विकासका हिसाबले पनि रुपन्देहीलाई पहिलो बनाउँछौँ’, उपाध्यक्ष पौडेलले भने ।

पौडेलले भविष्यमा मुलुकको सर्वोच्च कानूनी तहमा पुग्न शुभेच्छा व्यक्त गरे । शैक्षिक विकासमा कालिका मानव–ज्ञानले गरेका योगदानको उल्लेख गर्दै उनले मुलुकमै उत्कृष्ट पहिचान बनाउन सफल भएको उल्लेख गरे । ‘बुटवललाई नचिन्ने कोही होलान्, तर बुटवलको कालिकालाई नचिन्ने कोही छैनन्’ पौडेलले भने ।